લખનૌના ઐશબાગ રેલવે સ્ટેશન પર બોમ્બ હોવાની માહિતી મળતા જ તંત્રમાં દોડધામ મચી ગઈ હતી. પ્લેટફોર્મ નંબર-૧ પર બોમ્બ હોવાની સૂચના મળતાની સાથે જ રેલવે વહીવટીતંત્ર અને સુરક્ષા એજન્સીઓ એલર્ટ મોડ પર આવી ગઈ હતી. રેલવે સુરક્ષા દળ રાજકીય રેલવે પોલીસ અને બોમ્બ ડિસ્પોઝલ સ્કવોડની ટીમો તાત્કાલિક ઘટનાસ્થળે પહોંચી હતી અને સઘન તપાસ અભિયાન શરૂ કર્યું હતું. સ્ટેશન પરિસરમાં ઉભેલી ટ્રેનો, મુસાફરોના સામાન અને શંકાસ્પદ વસ્તુઓની ઝીણવટભરી તપાસ કરવામાં આવી હતી. હાલ સુરક્ષા એજન્સીઓ દ્વારા સમગ્ર વિસ્તારને સુરક્ષિત કરવાના પ્રયાસો ચાલુ છે અને મુસાફરોને સાવચેત રહેવા અપીલ કરવામાં આવી છે. હજુ સુધી કોઈ શંકાસ્પદ વસ્તુ મળી હોવાની સત્તાવાર પુષ્ટિ થઈ નથી.