નવી દિલ્હી: ઉત્તર પ્રદેશના અયોધ્યામાં આવેલા ભવ્ય રામ મંદિરમાં કથિત રીતે ચઢાવાના પૈસાની હેરાફેરી અને ચોરીના મામલે કોંગ્રેસે શાસક પક્ષ ભાજપ અને આરએસએસ પર પોતાના હુમલા તેજ કર્યા છે. કોંગ્રેસે બુધવારે નવી દિલ્હી ખાતે પક્ષના કાર્યાલયમાં એક મહત્વપૂર્ણ પ્રેસ કોન્ફરન્સ યોજીને આક્ષેપ કર્યો હતો કે રામ મંદિરમાં થયેલી ચોરી અક્ષમ્ય છે, અને વડાપ્રધાન નરેન્દ્રભાઈ મોદીએ આ સમગ્ર મામલાની નૈતિક જવાબદારી સ્વીકારીને દેશના લોકોની માફી માંગવી જોઈએ. કોંગ્રેસે આક્ષેપ કર્યો છે કે આ ચઢાવાની ચોરીએ દેશ સામે ભાજપ-આરએસએસનો અસલી ચહેરો અને ચરિત્ર ખુલ્લા પાડી દીધા છે.

સીસીટીવી ફૂટેજ અને ઓડિટ રિપોર્ટમાં ચોરીનો ખુલાસો:

પ્રેસ કોન્ફરન્સને સંબોધતા વરિષ્ઠ કોંગ્રેસ નેતા શક્તિસિંહ ગોહિલે જણાવ્યું હતું કે અયોધ્યાનું રામ મંદિર દેશના કરોડો નાગરિકોની આસ્થાનું કેન્દ્ર છે અને તેમાં થયેલી ચોરીને ક્યારેય માફ કરી શકાય નહીં. તેમણે શ્રી રામ જન્મભૂમિ તીર્થ ક્ષેત્ર ટ્રસ્ટ પર આકરા પ્રહારો કરતા કહ્યું કે, કરોડો ભક્તોએ ભગવાન શ્રી રામ માટે પૂરી શ્રદ્ધાથી ચઢાવો અર્પણ કર્યો છે પરંતુ ટ્રસ્ટે તેનો કોઈ હિસાબ રાખ્યો નથી. વધુમાં તેમણે દાવો કર્યો કે અયોધ્યા રામ મંદિરમાંથી ૪૦ દિવસના સીસીટીવી ફૂટેજ મળ્યા છે, જેમાં ૭૦ વાર ચોરીની ગંભીર ઘટનાઓ જોવા મળી છે. ૨૦૨૩ થી ૨૦૨૫ સુધીના ઓડિટ રિપોર્ટમાં પણ સ્પષ્ટ ઉલ્લેખ કરાયો છે કે મંદિરમાં ચઢાવાની ચોરી થઈ રહી છે. આટલું જ નહીં, સીસીટીવી કેમેરાનું કવરેજ પણ યોગ્ય જગ્યાઓ પર રાખવામાં આવ્યું નથી અને આ ગંભીર બાબતોની કોઈ તપાસ કરવામાં આવી નથી.

રોજ ૧૦ લાખ રૂપિયાની હેરાફેરીનો સનસનાટીભર્યો દાવો:

કોંગ્રેસ નેતા શક્તિસિંહ ગોહિલે આંકડાકીય માહિતી આપતા જણાવ્યું કે, જ્યાં સુધી રામ મંદિરમાં ચઢાવાની ચોરીની વાત બહાર આવી નહોતી, ત્યાં સુધી રોજનું ૧૬ થી ૧૮ લાખ રૂપિયા દાન જમા થતું હતું. પરંતુ જે દિવસથી મંદિરમાં ચોરીનો ખુલાસો થયો, તે જ દિવસથી દાનની રકમ વધીને રોજની ૨૪ થી ૨૬ લાખ રૂપિયા જમા થવા લાગી છે. આ બાબત સાબિત કરે છે કે મંદિરમાં દરરોજ અંદાજે ૧૦ લાખ રૂપિયાની મોટી હેરાફેરી કરવામાં આવતી હતી. ભાજપ પર નિશાન સાધતા તેમણે ઉમેર્યું કે, સનાતન ધર્મમાં શંકરાચાર્યનો આદેશ અંતિમ માનવામાં આવે છે. શંકરાચાર્યે કહ્યું હતું કે રામ મંદિરમાં કાર્યક્રમનું મુહૂર્ત શુભ નથી, પરંતુ રાજકીય અને ચૂંટણીલક્ષી ફાયદા માટે ભાજપે તેમની વાત માની નહોતી અને ભગવાનના નામનો રાજકીય સ્વાર્થ માટે ઉપયોગ કર્યો છે. તેમણે એમ પણ કહ્યું કે, દરેક રામ મંદિરમાં આખો રામ દરબાર હાજર હોય છે, પરંતુ આ પહેલું એવું મંદિર છે જ્યાં સીતા મૈયાનું સ્થાન જ રાખવામાં આવ્યું નથી.

મહંત લાલ દાસની હત્યાના મુદ્દે ઘેરાવ અને જમીન કૌભાંડનો આક્ષેપ:

શક્તિસિંહ ગોહિલે ભૂતકાળના બનાવનો ઉલ્લેખ કરતા કહ્યું કે, રામ મંદિરના મુખ્ય પૂજારી મહંત લાલ દાસે રથયાત્રા દરમિયાન કહ્યું હતું કે આ સ્થાનને ધાર્મિક જ રહેવા દો અને તેને રાજકારણનો અખાડો ન બનાવો. આ નિવેદન બાદ પહેલા તેમને પદ પરથી હટાવી દેવામાં આવ્યા હતા અને બાદમાં તેમની હત્યા કરી દેવાઈ હતી. તેમણે કૌભાંડનો આક્ષેપ કરતા વધુમાં જણાવ્યું કે, જ્યારે ટ્રસ્ટે ૨.૯ કરોડ રૂપિયાની જમીન અધધ ૧૮ કરોડ રૂપિયામાં ખરીદી હતી, ત્યારે જ આ ટ્રસ્ટને બરખાસ્ત કરી દેવાની જરૂર હતી. રામ મંદિરના તમામ કાર્યોનો શ્રેય વડાપ્રધાને પોતે લીધો હોવાથી, હવે તેમણે જ આ પાપની જવાબદારી સ્વીકારવી પડશે.

કોંગ્રેસ પક્ષની મુખ્ય ૫ ઉગ્ર માંગણીઓ:

  ટ્રસ્ટનો ભંગ: શ્રી રામ જન્મભૂમિ તીર્થ ક્ષેત્ર ટ્રસ્ટને તાત્કાલિક અસરે ભંગ કરવામાં આવે.

  નવા ટ્રસ્ટની રચના: શંકરાચાર્ય, સુપ્રીમ કોર્ટના નિવૃત્ત ન્યાયાધીશ, નિર્મોહી અખાડાના પ્રતિનિધિ અને સાધુ-સંતોને સાથે રાખીને એક નવા જ પારદર્શી ટ્રસ્ટનું નિર્માણ કરવામાં આવે.

  ચંપત રાયની ધરપકડ: તાજેતરમાં જ ટ્રસ્ટના જનરલ સેક્રેટરી પદ પરથી રાજીનામું આપનારા ચંપત રાયની તાત્કાલિક ધોરણે ધરપકડ કરવામાં આવે.

  સુપ્રીમ કોર્ટની દેખરેખ હેઠળ તપાસ: રામ મંદિરમાં થયેલી આ નાણાકીય ચોરી અને હેરાફેરીના સમગ્ર મામલાની ઉચ્ચ સ્તરીય તપાસ દેશની સર્વોચ્ચ અદાલત એટલે કે સુપ્રીમ કોર્ટની સીધી દેખરેખ હેઠળ કરાવવામાં આવે.

  વડાપ્રધાન માફી માંગે: વડાપ્રધાન નરેન્દ્રભાઈ મોદી આ સમગ્ર ઘટનાની નૈતિક જવાબદારી પોતાના શિરે લે અને દેશની જનતાની સમક્ષ જાહેર માફી માંગે.