પણજી : દરિયાકાંઠાના સુંદર વાતાવરણ અને નાઈટલાઈફ માટે વિશ્વભરમાં જાણીતા પ્રવાસન રાજ્ય ગોવાએ પોતાના ટુરિઝમ સેક્ટરને નવી ઊંચાઈઓ પર લઈ જવા માટે એક માસ્ટરપ્લાન તૈયાર કર્યો છે. ગોવાના પ્રવાસન મંત્રી રોહન ખાઉંટેએ નવી દિલ્હી ખાતે કેન્દ્રીય પ્રવાસન અને સંસ્કૃતિ મંત્રી ગજેન્દ્ર સિંહ શેખાવત સાથે ખાસ બેઠક યોજી હતી. આ બેઠકમાં તેમણે ગોવાના બંને આંતરરાષ્ટ્રીય એરપોર્ટ પરથી વિદેશી પ્રવાસીઓ માટે 'વિઝા-ઓન-અરાઈવલ' (Visa-on-Arrival) ની સુવિધા આપવા અને હવાઈ જોડાણ વધારવા માટે 'ઓપન સ્કાય નીતિ' (Open Sky Policy) ના લાભો આપવાની માંગ કરી છે.
બંને એરપોર્ટ પરથી આંતરરાષ્ટ્રીય કનેક્ટિવિટી વધારવાનો પ્લાન
ગોવાના મંત્રી રોહન ખાઉંટેએ કેન્દ્ર સરકાર સમક્ષ પ્રસ્તાવ મૂક્યો છે કે ઉત્તર ગોવાના નવા મોપા (મનોહર આંતરરાષ્ટ્રીય એરપોર્ટ) અને દક્ષિણ ગોવાના ડાબોલિમ એરપોર્ટ—બંને જગ્યાએ આંતરરાષ્ટ્રીય પ્રવાસીઓને એરપોર્ટ પર જ પહોંચતાની સાથે વિઝા મળી રહે તેવી વ્યવસ્થા ગોઠવવામાં આવે. આ ઉપરાંત, વિદેશી એરલાઈન્સ માટે 'ઓપન સ્કાય' નીતિ લાગુ કરવાથી વધુ આંતરરાષ્ટ્રીય એરલાઈન્સ ગોવા માટે સીધી ફ્લાઈટ્સ શરૂ કરવા આકર્ષાશે, જેનાથી પ્રવાસીઓને અન્ય શહેરોમાં ટ્રાન્સફર થયા વગર સીધી કનેક્ટિવિટી મળશે.
મધ્ય એશિયા અને CIS દેશોના ટૂરિસ્ટ્સ પર નજર
ગોવા સરકારે ખાસ કરીને મધ્ય એશિયા (Central Asia) અને કોમનવેલ્થ ઓફ ઈન્ડિપેન્ડન્ટ સ્ટેટ્સ (CIS) દેશોના પ્રવાસીઓને આકર્ષવા માટે ગોવાને પ્રાથમિકતા ધરાવતું 'કનેક્ટિવિટી પોઈન્ટ' જાહેર કરવા વિનંતી કરી છે. બેઠકમાં ગોવાને ભારતના મુખ્ય મહાનગરો સાથે જોડતી સ્થાનિક ફ્લાઈટ્સની ક્ષમતા વધારવા પર પણ વિસ્તૃત ચર્ચા થઈ હતી, જેથી વર્ષના ૩૬૫ દિવસ ગોવામાં ટુરિઝમનો ધમધમાટ જળવાઈ રહે.
બીચ ટુરિઝમથી આગળ વધીને 'ઓલ-સીઝન' ડેસ્ટિનેશન બનવાની તૈયારી
બેઠક બાદ માહિતી આપતાં પ્રવાસન મંત્રીએ જણાવ્યું હતું કે ગોવા હવે માત્ર સમુદ્રી કિનારા (બીચ) પૂરતું સીમિત નથી રહ્યું. તેમણે ઉમેર્યું કે, "ગોવા હવે વેલનેસ, હેરીટેજ, કલ્ચર, એડવેન્ચર, અને MICE (કોન્ફરન્સ અને બિઝનેસ ઈવેન્ટ્સ) માટેનું પણ મુખ્ય કેન્દ્ર બની રહ્યું છે." કેન્દ્ર સરકારના સહયોગથી ગોવાની પ્રવાસન ક્ષમતાને વૈશ્વિક સ્તરે વધુ મજબૂત બનાવવામાં આવશે, જેથી ઉચ્ચ મૂલ્ય ધરાવતા પ્રવાસીઓ સમગ્ર વર્ષ દરમિયાન ગોવાની મુલાકાત લઈ શકે.