અમરાવતી : આંધ્રપ્રદેશની બહુચર્ચિત 'મેગા DSC-2025' શિક્ષક ભરતી પ્રક્રિયા સામે મોટો કાનૂની અને રાજકીય વિવાદ ઊભો થયો છે. સમગ્ર ભરતી પ્રક્રિયામાં મોટા પાયે પ્રણાલીગત ગેરરીતિઓ, ભ્રષ્ટાચાર અને ખાસ કરીને સ્પોર્ટ્સ ક્વોટા નીતિમાં છેલ્લી ઘડીએ કરવામાં આવેલા શંકાસ્પદ ફેરફારોના આક્ષેપો સાથે આંધ્રપ્રદેશ હાઈકોર્ટમાં એક જાહેર હિતની અરજી (PIL) દાખલ કરવામાં આવી છે, જેમાં સમગ્ર મામલાની કેન્દ્રીય તપાસ બ્યુરો (CBI) દ્વારા સ્વતંત્ર તપાસ કરાવવાની જોરદાર માંગ કરવામાં આવી છે.
સ્પોર્ટ્સ ક્વોટામાં ગેરરીતિ અને કાયદાકીય ફેરફારોનો આરોપ
અરજદાર વતી હાઈકોર્ટમાં હાજર રહેલા વરિષ્ઠ વકીલ અને આંધ્રપ્રદેશના પૂર્વ એડવોકેટ જનરલ એસ. શ્રીરામ સુબ્રમણ્યમે દલીલ કરી હતી કે સરકારે મેગા DSC-2025 ની જાહેરાત જારી કરતા પહેલા જ સ્પોર્ટ્સ ક્વોટામાં મોટા ફેરફારો કર્યા હતા. રમતગમત અનામત ૨% થી વધારીને ૩% કરવામાં આવ્યું હતું અને પ્રવેશ પરીક્ષામાં લાયકાત મેળવવાની ફરજિયાત શરત પણ હટાવી દેવામાં આવી હતી. વકીલના જણાવ્યા મુજબ, ચોક્કસ પૂર્વનિર્ધારિત ઉમેદવારોને લાભ પહોંચાડવા માટે કોઈ પણ પારદર્શિતા વગર આ ફેરફારો કરવામાં આવ્યા હતા.
બોગસ પ્રમાણપત્રો અને સરકાર દ્વારા ઓર્ડર પાછો ખેંચવો
કોર્ટ સમક્ષ પુરાવા રજૂ કરતા વકીલે જણાવ્યું કે ઘણા ઉમેદવારોએ રાજ્ય કે રાષ્ટ્રીય સ્તરની સ્પર્ધાઓને બદલે માત્ર સ્થાનિક કે ક્ષેત્રીય રમતોના બોગસ સર્ટિફિકેટ્સ રજૂ કરીને નોકરીઓ મેળવી લીધી છે. વિરોધ અને જાહેર ટીકાઓ વધતાં સરકારે પાછળથી આ સ્પોર્ટ્સ ક્વોટા સંબંધિત ઓર્ડર પાછા ખેંચી લીધા હતા. અરજદાર પક્ષે દલીલ કરી હતી કે ઓર્ડર પાછા ખેંચવાની પ્રક્રિયા જ સાબિત કરે છે કે ભરતી નીતિમાં ગંભીર ગેરરીતિઓ આચરવામાં આવી હતી.
સમગ્ર ભરતી પ્રક્રિયાની કડક CBI તપાસની માગ
હાઈકોર્ટમાં RTI અને જાહેર સ્ત્રોતોમાંથી મળેલા પુરાવા રજૂ કરીને સમગ્ર પ્રક્રિયાની સીબીઆઈ તપાસની માંગ કરવામાં આવી છે. વકીલે કોર્ટને વિનંતી કરી છે કે તપાસ માત્ર એકાદ ઘટના પૂરતી સીમિત ન રહેતાં પ્રશ્નપત્રોના સેટિંગ, પરીક્ષાનું સંચાલન, સર્ટિફિકેટ વેરિફિકેશન, સ્પોર્ટ્સ ક્વોટાનો અમલ અને અંતિમ મેરિટ લિસ્ટ સહિતના તમામ તબક્કાઓ આવરી લેવામાં આવે. હાઈકોર્ટે તમામ દલીલો સાંભળ્યા બાદ આ મામલે વધુ સુનાવણી ત્રણ અઠવાડિયા પછી મુલતવી રાખી છે.