કોલંબો: ટાપુ દેશ શ્રીલંકામાં ડેન્ગ્યુના વધતા જતા પ્રકોપ સામે લડવા માટે ભારતે ફરી એકવાર પાડોશી ધર્મના પાલન સાથે મદદનો હાથ લંબાવ્યો છે. શ્રીલંકા ખાતેના ભારતીય હાઈ કમિશનર સંતોષ ઝાએ મંગળવારે દેશના આરોગ્ય પ્રધાન ડૉ. નલિન્દા જયતિસ્સા સાથે મુલાકાત કરીને તેમને ૫૦૦ લીટર 'ટેકનિકલ મેલાથિઓન' (જંતુનાશક દવા) ની ખાસ ભેટ સોંપી હતી. આ મદદથી શ્રીલંકાના આરોગ્ય વિભાગને મચ્છરજન્ય રોગચાળા અને ડેન્ગ્યુના વાયરસને ફેલાતો અટકાવવામાં મોટી સફળતા મળશે.
દર્દીઓથી ઉભરાઈ રહી છે શ્રીલંકાની સરકારી હોસ્પિટલો
શ્રીલંકામાં ડેન્ગ્યુના દૈનિક કેસોની સંખ્યા જે અગાઉ ૧,૦૦૦ ની ટોચ પર પહોંચી હતી, તે હવે ઘટીને ૫૦૦ ની આસપાસ આવી ગઈ છે. આમ છતાં, સ્થાનિક આરોગ્ય તંત્ર અને હોસ્પિટલો પરનું દબાણ હજુ ઘટ્યું નથી. 'ગવર્નમેન્ટ મેડિકલ ઓફિસર્સ એસોસિએશન' (GMOA) ના જણાવ્યા અનુસાર, દેશભરની મોટાભાગની સરકારી હોસ્પિટલોમાં ડેન્ગ્યુ સારવાર વોર્ડ ક્ષમતા કરતાં વધુ ભરાયેલા છે, જેના કારણે દવાનો પુરવઠો અને મચ્છર નિયંત્રણ અત્યંત જરૂરી બન્યું છે.
આરોગ્ય અને ઈન્ફ્રાસ્ટ્રક્ચરમાં ભારતની રૂ. $૭.૫ અબજથી વધુની સહાય
હાઈ કમિશનર સંતોષ ઝાએ સોશિયલ મીડિયા પર માહિતી આપતાં જણાવ્યું હતું કે શ્રીલંકાના તમામ ૨૫ જિલ્લાઓમાં ભારત સરકાર દ્વારા લોકકલ્યાણના અનેક પ્રોજેક્ટ્સ ચલાવવામાં આવી રહ્યા છે. ભારતે અત્યાર સુધીમાં ૮૫૦ મિલિયન ડોલરની ગ્રાન્ટ સહિત કુલ ૭.૫ અબજ ડોલરથી વધુની નાણાકીય અને વિકાસ સહાય પૂરી પાડી છે, જે ઘરગથ્થુ આવાસ, શિક્ષણ, આરોગ્ય સંભાળ, રેલવે અને ઉર્જા ક્ષેત્રે પરિવર્તન લાવી રહી છે.
દેનિયાયા હોસ્પિટલ માટે પણ રૂ. ૬૦૦ મિલિયન SLR ની ગ્રાન્ટ
આ અગાઉ, ભારતે આપત્તિગ્રસ્ત વિસ્તારમાંથી સ્થળાંતરિત થઈ રહેલી 'દેનિયાયા બેઝ હોસ્પિટલ'ને આધુનિક તબીબી સાધનો પૂરા પાડવા માટે ૬૦૦ મિલિયન શ્રીલંકન રૂપિયા (SLR) ની ગ્રાન્ટ આપવા કરાર કર્યા હતા. આ મદદ વાવાઝોડા પછી શ્રીલંકાના પુનર્નિર્માણ માટે જાહેર કરાયેલા $૪૫૦ મિલિયનના વિશિષ્ટ સહાય પેકેજનો જ એક ભાગ છે, જે ભારતની 'નેબરહુડ ફર્સ્ટ' (સૌથી પહેલા પાડોશી) નીતિનું ઉત્તમ ઉદાહરણ પૂરું પાડે છે.