લંડન : ઇંગ્લિશ ચેનલ પાર કરીને બ્રિટન પહોંચવાનો પ્રયાસ કરી રહેલા ૧૫૭ ગેરકાયદેસર સ્થળાંતરકારો (માઇગ્રન્ટ્સ) ભયાનક હોનારતનો ભોગ બનતા બનતા રહી ગયા હતા. મધ્ય દરિયે ફ્રેન્ચ અને બ્રિટિશ સીમા પર અચાનક તેમની નાની રબર બોટમાં આકસ્મિક રીતે ભીષણ આગ ફાટી નીકળી હતી, જેના કારણે ગભરાયેલા તમામ મુસાફરોએ જીવ બચાવવા દરિયામાં કૂદી પડવાની ફરજ પડી હતી. ઘટનાની જાણ થતાં જ બ્રિટિશ અને ફ્રેન્ચ દરિયાઈ અધિકારીઓએ તાત્કાલિક સંયુક્ત ઓપરેશન હાથ ધરીને તમામ ૧૫૭ લોકોને દરિયામાંથી સુરક્ષિત રીતે બહાર કાઢ્યા હતા.
૨૦૧૮ પછીનું સૌથી મોટું રેસ્ક્યુ ઓપરેશન
પાસ-ડી-કેલાઈસ પ્રીફેક્ચર દ્વારા જારી કરવામાં આવેલા સત્તાવાર નિવેદન અનુસાર, આ ઘટના મંગળવારે વહેલી સવારે ઘટી હતી. બોટ સોમવારે ફ્રાન્સના નોર્મેન્ડી સ્થિત 'વેયુલ્સ-લેસ-રોઝ' દરિયાકાંઠાના ગામથી યુકે જવા માટે ઉપટી હતી. ૨૦૧૮ માં રેકોર્ડ શરૂ થયા પછીના ઇતિહાસમાં આ અત્યાર સુધીના સૌથી મોટા બચાવ કાર્યોમાંથી એક માનવામાં આવે છે. રાહતની વાત એ છે કે આ દુર્ઘટનામાં કોઈ જાનહાનિ થઈ નથી અને સમયસર મળેલી મદદને કારણે તમામ લોકોનો આબાદ બચાવ થયો છે.
ગેરકાયદેસર ક્રોસિંગ અને માનવ તસ્કરોનો ખતરનાક ખેલ
ફ્રાન્સ લાંબા સમયથી બ્રિટન જવા માંગતા ગેરકાયદેસર શરણાર્થીઓ માટે લોન્ચપેડ બની રહ્યું છે. શરણાર્થીઓ માનવ તસ્કરોને હજારો ડોલર ચૂકવીને આવી ખતરનાક રબર બોટમાં બ્રિટન પહોંચવાનો પ્રયાસ કરે છે. આંકડાઓ અનુસાર, ગયા વર્ષે ૪૧,૦૦૦ થી વધુ ગેરકાયદેસર શરણાર્થીઓ આ રૂટ દ્વારા યુકે પહોંચ્યા હતા. તાજેતરમાં માનવ તસ્કરો મોટી બોટોનો ઉપયોગ કરી રહ્યા છે, જેના કારણે પ્રતિ બોટ સરેરાશ મુસાફરોની સંખ્યા ૨૦૨૧ માં ૨૬ હતી જે વધીને આ વર્ષે ૬૫ સુધી પહોંચી ગઈ છે. આ ખતરનાક સફરમાં ગયા વર્ષે ૨૯ અને આ વર્ષે અત્યાર સુધીમાં ૧૪ લોકો પોતાના જીવ ગુમાવી ચૂક્યા છે.
બ્રિટનમાં રાજકીય ગરમાવો અને સુરક્ષાના કડક પગલાં
આ ઘટના એવા સમયે બની છે જ્યારે બ્રિટન સહિત સમગ્ર યુરોપમાં ગેરકાયદેસર ઇમિગ્રેશન વિરોધી વાતાવરણ મજબૂત બની રહ્યું છે. બ્રિટિશ દૂર-જમણેરી પક્ષ 'રિફોર્મ યુકે' એ દાવો કર્યો છે કે જો તેઓ સત્તા પર આવશે તો ઇંગ્લિશ ચેનલમાં રોયલ નેવી તૈનાત કરીને આવી તમામ બોટોને અટકાવવામાં આવશે અને સ્થળાંતર કરનારાઓને તેમના મૂળ દેશ અથવા ફ્રેન્ચ દરિયાકિનારે પરત મોકલી દેવામાં આવશે.