નવી દિલ્હી : દેશમાં પર્યાવરણ અનુકૂળ અને ગ્રીન ટ્રાન્સપોર્ટેશનને પ્રોત્સાહન આપવા માટે ભારત સરકારની 'પીએમ ઈ-ડ્રાઈવ' (PM E-DRIVE) યોજના અંતર્ગત ભારે સફળતા મળી રહી છે. કેન્દ્રીય ભારે ઉદ્યોગ મંત્રાલય દ્વારા લોકસભામાં રજૂ કરવામાં આવેલી માહિતી મુજબ, આ યોજના હેઠળ અત્યાર સુધીમાં ૨૬.૫૪ લાખથી વધુ ઈલેક્ટ્રિક વાહનો (EV) ના વેચાણને સીધો ટેકો મળ્યો છે. દેશમાં ઈવી વેચાણની બાબતમાં મહારાષ્ટ્ર ૪.૨૮ લાખ વાહનો સાથે સમગ્ર દેશમાં મોખરે રહ્યું છે, જ્યારે ઉત્તર પ્રદેશ અને કર્ણાટક અનુક્રમે બીજા અને ત્રીજા ક્રમે રહ્યા છે.

૧૦,૯૦૦ કરોડનું બજેટ અને વાહનોનું સેગમેન્ટ વાઈઝ ભંડોળ

સરકારે ૧ એપ્રિલ, ૨૦૨૪ થી ૩૧ માર્ચ, ૨૦૨૮ સુધીના ચાર વર્ષના ગાળા માટે પીએમ ઈ-ડ્રાઈવ યોજના માટે રૂ. ૧૦,૯૦૦ કરોડનું વિશાળ બજેટ ફાળવ્યું છે. આ યોજના હેઠળ અત્યાર સુધીમાં ૨૩.૭૯ લાખ ઈલેક્ટ્રિક ટુ-વ્હીલર્સ, ૨.૬૮ લાખ ઈલેક્ટ્રિક થ્રી-વ્હીલર્સ, ૬,૫૪૭ ઈ-રિક્ષા અને ૫૫ ઈલેક્ટ્રિક ટ્રકને નાણાકીય સહાય પૂરી પાડવામાં આવી છે. આ ઉપરાંત, જાહેર પરિવહનને સુધારવા માટે દેશભરમાં ૧૪,૦૦૦ ઈ-બસો પણ ફાળવવામાં આવી છે.

૫,૮૭૧ નવા ચાર્જર્સને મંજૂરી અને ચાર્જિંગ નેટવર્કનો વિસ્તાર

દેશભરમાં ઈવી ચાર્જિંગ સ્ટેશનોનું નેટવર્ક મજબૂત કરવા માટે પીએમ ઈ-ડ્રાઈવ હેઠળ નવ રાજ્યોમાં ૫,૮૭૧ નવા ઈવી ચાર્જર્સ માટેના પ્રસ્તાવોને લીલી ઝંડી આપવામાં આવી છે. જેમાં કર્ણાટકને સૌથી વધુ ૧,૫૭૧, દિલ્હીને ૧,૧૪૬ અને રાજસ્થાનને ૮૦૫ ચાર્જર્સ ફાળવાયા છે. જાહેર ચાર્જિંગ સ્ટેશનો સ્થાપવા માટે સરકારે રૂ. ૨,૦૦૦ કરોડનું અલગ ભંડોળ અનામત રાખ્યું છે. ઉલ્લેખનીય છે કે અગાઉની 'FAME-II' યોજના હેઠળ પણ દેશભરમાં ૯,૫૮૩ જાહેર ચાર્જિંગ સ્ટેશનો સ્થાપવામાં આવ્યા હતા અને ૧૬.૭૧ લાખ વાહનોને મદદ મળી હતી.

મેક ઈન ઈન્ડિયા અને ટેસ્ટિંગ લેબ્સ માટે ₹૭૮૦ કરોડનું રોકાણ

ઈલેક્ટ્રિક વાહનો અને બેટરી પેકનું દેશમાં જ નિર્માણ થાય તે માટે 'ફેઝ્ડ મેન્યુફેક્ચરિંગ પ્રોગ્રામ' (PMP) ફરજિયાત કરવામાં આવ્યો છે. આ ઉપરાંત દેશમાં ઈવી ટેસ્ટિંગ અને સર્ટિફિકેશન ક્ષમતાઓને વૈશ્વિક સ્તરની બનાવવા માટે સરકાર રૂ. ૭૮૦ કરોડના ખર્ચે ARAI, ICAT, NATRAX અને GARC જેવી ચાર મુખ્ય સરકારી પરીક્ષણ એજન્સીઓને આધુનિક બનાવી રહી છે.