વોશિંગ્ટન : અમેરિકામાં કામ કરતા ભારતીય આઈટી વ્યાવસાયિકો અને ટેકનોલોજી કંપનીઓ માટે માઠા સમાચાર આવ્યા છે. ટ્રમ્પ પ્રશાસન H-1B અને L-1 વિઝા ધરાવતા કર્મચારીઓના એક્સટેન્શન (મુદત વધારવાની અરજીઓ) પર હાલની વિઝા ફી લંબાવીને તેને નોંધપાત્ર રીતે મોંઘી કરવાની તૈયારી કરી રહ્યું છે. જો આ પ્રસ્તાવને આખરી મંજૂરી મળી જશે, તો અમેરિકી નોકરીદાતાઓએ પોતાના વર્તમાન કર્મચારીઓના વિઝા રિન્યુ કરતી વખતે દરેક વખતે હજારો ડોલર વધુ ચૂકવવા પડશે.

એક્સટેન્શન અરજીઓ પર લાગશે $૪,૦૦૦ થી $૪,૫૦૦ સુધીનો વધારાનો બોજ

હાલના નિયમો મુજબ, યુએસમાં ૫૦ થી વધુ કર્મચારીઓ ધરાવતી કંપનીઓ (જેમાં ૫૦% થી વધુ કર્મચારીઓ H-1B કે L-1 વિઝા પર હોય) ને માત્ર નવી અરજી કે નોકરી બદલતી વખતે જ H-1B માટે વધારાના $૪,૦૦૦ (આશરે ₹૩.૩૫ લાખ) અને L-1 માટે $૪,૫૦૦ ની '9-11 પ્રતિભાવ અને બાયોમેટ્રિક એન્ટ્રી-એક્ઝિટ ફી' ચૂકવવી પડતી હતી. પરંતુ યુએસ ડિપાર્ટમેન્ટ ઓફ હોમલેન્ડ સિક્યોરિટી (DHS) ની નવી દરખાસ્ત હેઠળ, હવે વિઝા એક્સટેન્શન માટેની તમામ અરજીઓ પર પણ આ ફી વસૂલવામાં આવશે, જેનાથી અમેરિકી કંપનીઓ માટે વિદેશી પ્રતિભાઓને જાળવી રાખવી અત્યંત મોંઘી બનશે.

ભારતીયો સૌથી વધુ પ્રભાવિત: રિન્યુઅલમાં ૭૭.૬% હિસ્સો

આ નવા નિર્ણયની સૌથી મોટી અસર ભારતીય પ્રોફેશનલ્સ પર પડશે, કારણ કે અમેરિકામાં H-1B વિઝા એક્સટેન્શન મેળવનારાઓમાં ભારતીયો સૌથી આગળ છે. USCIS ના ડેટા અનુસાર, નાણાકીય વર્ષ ૨૦૨૫ માં મંજૂર થયેલી ૪.૦૬ લાખ H-1B અરજીઓમાંથી ૨.૯૧ લાખ (૭૧%) અરજીઓ નવી નોકરી માટે નહીં પરંતુ જૂની નોકરી ચાલુ રાખવા (એક્સટેન્શન) માટે હતી. આ એક્સટેન્શન મેળવનારાઓમાં ૨,૨૬,૩૫૯ મંજૂરીઓ (૭૭.૬%) સાથે ભારતીયો પ્રથમ ક્રમે હતા, જ્યારે ચીન (૧૦.૮%) બીજા ક્રમે હતું.

બિગ ટેક અને આઈટી સર્વિસ કંપનીઓ પર આર્થિક બોજ વધશે

વિઝા મોંઘા થવાને કારણે અમેરિકાની મોટા ગજ્જાની ટેકનોલોજી કંપનીઓ અને ભારતીય IT સર્વિસ પ્રોવાઈડર્સનું બજેટ ખોરવાઈ શકે છે. NFAP ના અહેવાલ મુજબ, નાણાકીય વર્ષ ૨૦૨૫ માં અમેરિકામાં સૌથી વધુ H-1B એક્સટેન્શન મેળવનારી કંપનીઓમાં એમેઝોન (૧૪,૫૩૨) ટોચ પર રહી હતી. આ સિવાય TCS (૫,૨૯૩), માઇક્રોસોફ્ટ (૪,૮૬૩), મેટા (૪,૭૪૦), એપલ (૪,૬૧૦) અને ગુગલ (૪,૫૦૯) જેવી દિગ્ગજ કંપનીઓએ પણ હજારો કર્મચારીઓ માટે રિન્યુઅલ મેળવ્યા હતા, જેથી આ કંપનીઓ પર કરોડો ડોલરનો વધારાનો બોજ પડશે.