નવી દિલ્હી : પાકિસ્તાન દ્વારા ભારત સાથેની સરહદે ચીન નિર્મિત ૨૫૦ જેટલી અતિઆધુનિક SH-15 સેલ્ફ-પ્રોપેલ્ડ હોવિત્ઝર તોપો તૈનાત કરવામાં આવ્યાના અહેવાલો સામે આવ્યા બાદ ભારત સરકારે આક્રમક અને સ્પષ્ટ વલણ અપનાવ્યું છે. વિદેશ મંત્રાલયે પાકિસ્તાનને આકરા શબ્દોમાં ચેતવણી આપતા જણાવ્યું છે કે ભારત પોતાના રાષ્ટ્રીય હિતોની સુરક્ષા માટે જે પણ જરૂરી પગલાં લેવા પડશે તે તમામ પગલાં લેશે.

ઓપરેશન સિંદૂર યાદ અપાવી ભારતે આપ્યો સણસણતો જવાબ

સાપ્તાહિક મીડિયા બ્રીફિંગ દરમિયાન વિદેશ મંત્રાલયના પ્રવક્તા રણધીર જયસ્વાલે જણાવ્યું હતું કે, સીમાપારથી ફેલાવાતા આતંકવાદ સામે ભારતનું વલણ બિલકુલ સ્પષ્ટ અને અપરિવર્તિત છે. તેમણે ભૂતકાળના સૈન્ય ઓપરેશનનો ઉલ્લેખ કરતા કહ્યું, "ઓપરેશન સિંદૂર દરમિયાન દુશ્મનને કેવો યોગ્ય જવાબ આપવામાં આવ્યો હતો તે આખી દુનિયાએ જોયું છે. અમારું સ્પષ્ટ માનવું છે કે સીમાપાર આતંકવાદ તાત્કાલિક બંધ થવો જોઈએ. દેશની સુરક્ષા અને રાષ્ટ્રીય હિત માટે અમે હંમેશાં સંપૂર્ણપણે સતર્ક અને તૈનાત છીએ."

ચીન નિર્મિત SH-15 હોવિત્ઝર તોપોથી પાકિસ્તાનનો સૈન્ય જમાવડો

ગુપ્તચર અહેવાલો મુજબ, પાકિસ્તાને પોતાના સૈન્યના આધુનિકીકરણના નામે ભારત સાથેની પૂર્વ સરહદે ઉત્તરથી દક્ષિણ સુધીના મહત્વના વિસ્તારો જેવા કે ગુજરાંવાલા, સિયાલકોટ અને શિકારગઢ બલ્જ ક્ષેત્રમાં ચીનની નોરિંકો (NORINCO) કંપની દ્વારા બનાવાયેલી ૨૫૦ જેટલી ૧૫૫ એમએમ SH-15 ટ્રક-માઉન્ટેડ તોપો તૈનાત કરી છે. આ તોપો પૃથ્વી પર ૯૦ કિમી/કલાકની ઝડપે દોડી શકે છે અને રોકેટ-સહાયિત ગોળા ફેંકીને ૫૦ થી ૭૦ કિલોમીટર સુધીના અંતરે સચોટ નિશાન સાધી શકે છે.

PoJK માં યોજાયેલી ચૂંટણીને ભારતે ગણાવી 'તમાશો'

આ જ બ્રીફિંગ દરમિયાન ભારતે પાકિસ્તાન કબજા હેઠળના જમ્મુ-કાશ્મીર (PoJK) માં તાજેતરમાં પાકિસ્તાન સરકાર દ્વારા યોજાયેલી સ્થાનિક ચૂંટણીઓને સખત શબ્દોમાં ફગાવી દેતાં તેને એક 'તમાશો' ગણાવ્યો હતો. રણધીર જયસ્વાલે ઉમેર્યું કે પાકિસ્તાની સેના ત્યાંના સ્થાનિક નાગરિકોનો અવાજ દબાવવા માટે બંદૂક અને દમનનો સહારો લઈ રહી છે, જેમાં જૂન મહિનાથી અત્યાર સુધીમાં ૯૦ થી વધુ નિર્દોષ નાગરિકોના મોત થયા છે. ભારત પોતાની આર્ટિલરી ક્ષમતાઓ જેમ કે M777, K-9 વજ્ર અને ધનુષ તોપો દ્વારા દુશ્મનના કોઈપણ દુસાહસનો જડબાતોડ જવાબ આપવા માટે સજ્જ છે.