નવી દિલ્હી : સોશિયલ મીડિયાના યુગમાં સરકારી યોજનાઓ અને ઓનલાઈન કમાણી સંબંધિત અનેક અફવાઓ રોજેરોજ વાયરલ થતી હોય છે. હાલમાં જ એક વીડિયો ફેસબુક, વોટ્સએપ અને યૂટ્યુબ પર ઝડપથી વાયરલ થઈ રહ્યો છે, જેમાં એવો સનસનાટીભર્યો દાવો કરવામાં આવી રહ્યો છે કે જૂના સિક્કાઓ વેચીને સામાન્ય નાગરિકો રૂ. ૫ લાખથી ૧૦ લાખ સુધીની કમાણી કરી શકે છે. આ વીડિયોમાં વડાપ્રધાન નરેન્દ્ર મોદી પોતે સરકારી સિક્કા પ્રદર્શન અને ખરીદદારોને સમર્થન આપતા જોવા મળે છે, જેના કારણે લાખો લોકો છેતરપિંડીનો શિકાર બને તેવી શક્યતા ઊભી થઈ હતી.

વાયરલ વીડિયો પાછળનું શું છે સત્ય?

વાયરલ વીડિયોમાં એવું દર્શાવવામાં આવ્યું છે કે ભારત સરકાર દ્વારા જૂના સિક્કાઓનું એક ખાસ પ્રદર્શન યોજવામાં આવી રહ્યું છે. કોઈપણ વ્યક્તિ પોતાના ઘરના જૂના સિક્કા, ખાસ કરીને રૂ. ૫ અને રૂ. ૧૦ ના માતા વૈષ્ણોદેવીનું ચિત્ર ધરાવતા સિક્કા લાવીને સીધા સરકારને વેચી શકે છે અને તેના બદલામાં લાખો રૂપિયા રોકડા મેળવી શકે છે. જોકે, આ બાબતે તપાસ હાથ ધરતાં સામે આવ્યું છે કે આ વીડિયો સંપૂર્ણપણે નકલી (Fake) છે અને ફેબ્રિકેટેડ ડિજિટલ તકનીકનો ઉપયોગ કરીને બનાવવામાં આવ્યો છે.

PIB ફેક્ટ ચેકે નકારી અફવા: લોકોને કરી સાવચેત

કેન્દ્ર સરકારની સત્તાવાર એજન્સી 'PIB ફેક્ટ ચેક' (PIB Fact Check) દ્વારા આ વાયરલ વીડિયોની તપાસ કરવામાં આવી હતી અને પોતાના અધિકૃત સોશિયલ મીડિયા હેન્ડલ પરથી સ્પષ્ટતા કરવામાં આવી છે. PIB એ જણાવ્યું છે કે વડાપ્રધાન નરેન્દ્ર મોદીનો આ વીડિયો 'ડિજિટલી મેનિપ્યુલેટેડ' એટલે કે એડિટ કરીને બનાવવામાં આવ્યો છે. વડાપ્રધાને કે ભારત સરકારે જૂના સિક્કાઓની ખરીદી માટે કોઈ પ્રદર્શન કે અધિકૃત ખરીદદારને સમર્થન આપ્યું નથી.

ઓનલાઈન ઠગાઈથી બચવા સરકારની સલાહ

જનતાને આવી ગેરમાર્ગે દોરતી જાહેરાતોથી દૂર રહેવા અને ઓનલાઈન સાયબર ફ્રોડનો શિકાર ન બનવા માટે એજન્સીએ અપીલ કરી છે. સરકારે સ્પષ્ટ કર્યું છે કે જો કોઈ વ્યક્તિ કે એજન્સી જૂના સિક્કા ખરીદવાના નામે રજિસ્ટ્રેશન ફી કે અન્ય ચાર્જ માંગે તો તે સંપૂર્ણપણે સાયબર ગુનો છે. જો નાગરિકોને ભારત સરકાર સંબંધિત કોઈ પણ શંકાસ્પદ દાવાની સત્યતા ચકાસવી હોય તો તેઓ સીધો PIB Fact Check નો સંપર્ક કરી શકે છે.