વોશિંગ્ટન: તા.05: અમેરિકાની ભૂમિ પર ઉચ્ચ શિક્ષણ મેળવીને સોનેરી ભવિષ્ય બનાવવાની તૈયારી કરી રહેલા ભારતીય વિદ્યાર્થીઓ માટે અત્યંત ચિંતાજનક આંકડા સામે આવ્યા છે. યુએસ ઇમિગ્રેશન વિરોધી થિંક ટેન્ક 'સેન્ટર ફોર ઇમિગ્રેશન સ્ટડીઝ' (CIS) દ્વારા જાહેર કરવામાં આવેલા તાજેતરમાં પૃથ્થકરણ મુજબ, વર્ષ ૨૦૨૫ની મુખ્ય એડમિશન સીઝન (મે થી ઓગસ્ટ) દરમિયાન ભારતીય નાગરિકોને જારી કરવામાં આવેલા F-1 સ્ટુડન્ટ વિઝાની સંખ્યામાં ગત વર્ષની સરખામણીએ ૬૨% જેટલો જંગી ઘટાડો નોંધાયો છે. ટ્રમ્પ વહીવટીતંત્ર દ્વારા આંતરરાષ્ટ્રીય વિદ્યાર્થીઓ માટે કડક બનાવવામાં આવેલી સ્ક્રીનીંગ પ્રક્રિયા અને ઇમિગ્રેશન નીતિઓને કારણે આ પરિસ્થિતિ સર્જાઈ છે.
ગત વર્ષે ૨૦૨૪ના એ જ સમયગાળામાં ભારતીય વિદ્યાર્થીઓને ૫૮,૬૯૪ વિઝા આપવામાં આવ્યા હતા, જે ઘટીને વર્ષ ૨૦૨૫માં માત્ર ૨૨,૧૪૯ જ રહી ગયા છે. આ જ રીતે ચીનના વિદ્યાર્થીઓ માટે પણ વિઝા મંજૂરીમાં ૩૪%નો ઘટાડો જોવા મળ્યો છે. અમેરિકન યુનિવર્સિટીઓમાં ભારતીય અને ચીની વિદ્યાર્થીઓનો હિસ્સો કુલ આંતરરાષ્ટ્રીય વસ્તીના ૫૩% જેટલો મોટો રહેલો છે. જોકે, ટ્રમ્પ સરકારે મે ૨૦૨૫થી વિઝા ઇન્ટરવ્યુમાં અસ્થાયી રોક લગાવીને સોશિયલ મીડિયા એકાઉન્ટ્સની સખત રાષ્ટ્રીય સુરક્ષા તપાસ ફરજિયાત બનાવી દીધી હતી. તે ઉપરાંત હાર્વર્ડ જેવી અગ્રણી સંસ્થાઓમાં ચોક્કસ આંતરરાષ્ટ્રીય વિઝા પર અસ્થાયી રોક લગાવવા જેવા આકરા પગલાં પણ લેવાયા છે.
આ સિવાય, ડિપાર્ટમેન્ટ ઓફ હોમલેન્ડ સિક્યુરિટીએ વિદ્યાર્થીઓના રોકાણ માટે વર્ષો જૂની 'સ્થિતિ અવધિ' પ્રણાલી નાબૂદ કરીને મહત્તમ ૪ વર્ષની નિશ્ચિત મર્યાદા નક્કી કરી દીધી છે. વધુમાં, અભ્યાસ પૂર્ણ કર્યા બાદ મળતી વૈકલ્પિક પ્રેક્ટિકલ ટ્રેનિંગ (OPT) વર્ક પરમિટ યોજના પર પણ $૧૦૦,૦૦૦ સુધીની ભારે ફી લાદવાની દરખાસ્ત વિચારણા હેઠળ છે. વહીવટીતંત્રનું માનવું છે કે OPT પ્રોગ્રામના કારણે સ્થાનિક અમેરિકન સ્નાતકોને બદલે વિદેશી વિદ્યાર્થીઓને નાણાકીય પ્રોત્સાહન મળતું હતું અને સુરક્ષા જોખમો ઊભા થતા હતા. આ કડક સુધારાઓને કારણે આગામી સમયમાં અમેરિકી યુનિવર્સિટીઓમાં ભારતીય વિદ્યાર્થીઓનો પ્રવેશ અને રોકાણ બંને અત્યંત પડકારજનક બની રહેશે.