ચંડીગઢ: તા.05: સ્કોટલેન્ડના ગ્લાસગો ખાતે યોજાયેલી કોમનવેલ્થ ગેમ્સ ૨૦૨૬ માં ભારત માટે ઉત્કૃષ્ટ પ્રદર્શન કરનારા ખેલાડીઓનું સન્માન કરવા હરિયાણા સરકાર શુક્રવારે પંચકુલા ખાતે એક ભવ્ય સમારોહનું આયોજન કરવા જઈ રહી છે. મુખ્યમંત્રી નાયબ સિંહ સૈની પોતે હરિયાણાના એથ્લેટ્સનું સન્માન કરશે. ભારતે આ ગેમ્સમાં જીતેલા કુલ ૧૩ ગોલ્ડ મેડલમાંથી ૭ ગોલ્ડ એકલા હરિયાણાના ખેલાડીઓએ જીત્યા છે, જેમાં ૬ ગોલ્ડ માત્ર બોક્સિંગ રમતમાંથી આવ્યા છે. હરિયાણાના ખેલાડીઓએ ભારતને કુલ ૧૦ મેડલ અપાવીને દેશનું નામ રોશન કર્યું છે.

બીજી તરફ, ગ્લાસગો ૨૦૨૬ ના શાનદાર સમાપન સમારોહ દરમિયાન સ્કોટલેન્ડે ઔપચારિક રીતે કોમનવેલ્થ ગેમ્સનો ધ્વજ અને દંડૂકો (Baton) ભારતીય પ્રતિનિધિઓને સોંપ્યો છે. ભારતના ઓલિમ્પિક ગોલ્ડ મેડલિસ્ટ નીરજ ચોપરા, આઈઓએ (IOA) ના પ્રમુખ પીટી ઉષા અને ગુજરાતના નાયબ મુખ્યમંત્રી હર્ષ સંઘવીએ આ સોંપણીનો સ્વીકાર કર્યો હતો. વર્ષ ૨૦૩૦ માં કોમનવેલ્થ ગેમ્સની શતાબ્દી આવૃત્તિનું આયોજન ગુજરાતના અમદાવાદ શહેરમાં થશે, જેની સાથે જ ભારત ઓસ્ટ્રેલિયા પછી એક કરતાં વધુ વખત આ બહુ-રમતગમત ઈવેન્ટ યોજનારો બીજો દેશ બનશે.

ગ્લાસગો ૨૦૨૬ માં ભારતે ૧૩ ગોલ્ડ, ૧૭ સિલ્વર અને ૯ બ્રોન્ઝ સાથે કુલ ૩૯ મેડલ જીતીને મેડલ ટેલીમાં ચોથું સ્થાન જાળવી રાખ્યું છે. અગાઉની સરખામણીએ ઘણી રમતો રદ કરાઈ હોવા છતાં અને માત્ર ૧૨૨ ખેલાડીઓની નાની ટુકડી હોવા છતાં ભારતીય એથ્લેટ્સનો મેડલ કન્વર્ઝન રેટ ઘણો સારો રહ્યો હતો, જેમાં ૩૮ ખેલાડીઓ મેડલ સાથે સ્વદેશ પરત ફર્યા છે. લાંબા અંતરના દોડવીર ગુલવીર સિંહ બે મેડલ જીતનાર એકમાત્ર ભારતીય ખેલાડી બન્યા હતા.