ક્વેટા : પાકિસ્તાનના બલુચિસ્તાન પ્રાંતમાં પાકિસ્તાની સેના દ્વારા લાદવામાં આવેલી મહિનાઓ લાંબી લશ્કરી નાકાબંધી વચ્ચે અમાનવીય અત્યાચારો ચરમસીમાએ પહોંચ્યા છે. બલુચ નેશનલ મૂવમેન્ટ (BNM) એ ગંભીર આરોપ લગાવ્યો છે કે નુશ્કી જિલ્લામાં છેલ્લા એક અઠવાડિયા દરમિયાન પાકિસ્તાની દળો દ્વારા ઓછામાં ઓછા નવ નિર્દોષ નાગરિકોની હત્યા કરવામાં આવી છે અને ડઝનેક લોકોને બળજબરીથી અજ્ઞાત સ્થળે ઉપાડી જઈને ગાયબ કરી દેવામાં આવ્યા છે. સેનાની કડક નાકાબંધીના કારણે સમગ્ર પ્રદેશ એક 'ખુલ્લી જેલ' બની ગયો છે અને સામાન્ય જનજીવન સંપૂર્ણપણે ખોરવાઈ ગયું છે.

સ્થાનિક તંત્ર અને સેના દ્વારા લાદવામાં આવેલા અનધિકૃત કર્ફ્યુનો લાભ લઈને પાકિસ્તાની સૈનિકો બજારોમાં દુકાનો લૂંટી રહ્યા છે અને નાગરિક સંપત્તિને મોટા પાયે નુકસાન પહોંચાડી રહ્યા છે. વાહનવ્યવહાર પર મૂકવામાં આવેલા સંપૂર્ણ પ્રતિબંધના કારણે પ્રદેશમાં આવશ્યક ખાદ્ય સામગ્રી અને દવાઓની તીવ્ર અછત સર્જાઈ છે. ગંભીર રીતે બીમાર દર્દીઓ, બાળકો અને વૃદ્ધો માટે સ્થિતિ અત્યંત ગંભીર બની ગઈ છે, કારણ કે હોસ્પિટલ તરફ જતી એમ્બ્યુલન્સોને પણ સેના દ્વારા અટકાવવામાં આવી રહી છે.

બીએનએમ અને બલૂચ યાકજેહતી સમિતિ (BYC) એ આ ઘટનાઓને બલૂચ જનતા પર પાકિસ્તાની રાજ્ય દ્વારા લાદવામાં આવેલી 'સામૂહિક સજા'નું કઠોર સ્વરૂપ ગણાવ્યું છે. સંગઠને દાવો કર્યો છે કે બલૂચ સ્વતંત્રતા ચળવળ સામે સતત હાર અને નિરાશાનો સામનો કરી રહેલી પાકિસ્તાની સેના પોતાનું ઘટેલું મનોબળ પાછું મેળવવા માટે નિઃશસ્ત્ર નાગરિકો પર જુલ્મ ગુજારી રહી છે. આ પરિસ્થિતિને ધ્યાનમાં રાખીને બલૂચ નેતાઓએ યુનાઇટેડ નેશન્સ અને વૈશ્વિક માનવાધિકાર સંસ્થાઓને નુશ્કીમાં થઈ રહેલા ગંભીર માનવાધિકાર ઉલ્લંઘનો સામે તાત્કાલિક કડક પગલાં લેવા આહ્વાન કર્યું છે.