પુણે : મહારાષ્ટ્રના પુણે શહેરમાં ત્રણ હત્યાના આરોપીઓને પોલીસ વાહનના બોનેટ સાથે બાંધીને જાહેર રસ્તાઓ પર પરેડ કરાવવાના ચકચારી કેસની મહારાષ્ટ્ર રાજ્ય માનવ અધિકાર પંચે (MSHRC) સ્વતઃ નોંધ (Suo Motu) લીધી છે. આ ઘટનાને અત્યંત "બર્બર" અને "જંગલ રાજ" સમાન ગણાવીને પંચે રાજ્ય સરકાર તથા ઉચ્ચ પોલીસ અધિકારીઓને નોટિસ જારી કરી પ્રાથમિક તપાસનો આદેશ આપ્યો છે. જસ્ટિસ એ.એમ. બદરની આગેવાની હેઠળની પૂર્ણ બેન્ચે મહારાષ્ટ્રના મુખ્ય સચિવ, ડીજીપી, પુણે પોલીસ કમિશનર અમિતેશ કુમાર અને ડીસીપી મિલિંદ મોહિતે સહિતના અધિકારીઓ પાસે સ્પષ્ટતા માંગી છે.

સોશિયલ મીડિયા પર વાયરલ થયેલા આઘાતજનક વિડીયોમાં જોઈ શકાય છે કે, ધરપકડ કરાયેલા આરોપીઓને ઘૂંટણિયે ચલાવવામાં આવ્યા હતા અને ત્યારબાદ પોલીસ વાહનના બોનેટ પર બાંધીને શહેરમાં ફેરવવામાં આવ્યા હતા. આ દરમિયાન જાહેર જનતાને પોલીસની હાજરીમાં આરોપીઓ પર હુમલો કરવાની તક મળી હતી, જ્યારે ઘટનાસ્થળે હાજર બાળકોને પણ અપમાનિત કરવામાં આવ્યા હતા. પંચે અવલોકન કર્યું કે, કોઈપણ વ્યક્તિનો અપરાધ સાબિત થાય તે પહેલાં આ પ્રકારનું જાહેર અપમાન ભારતીય બંધારણની કલમ ૨૧ હેઠળ મળેલા જીવન અને ગૌરવના મૂળભૂત અધિકારોનું સરેઆમ ઉલ્લંઘન છે.

કમિશને આ ઘટનાની સરખામણી કાશ્મીરમાં ફારુક અહમદ ડારને આર્મી વહાન પર બાંધવાની જૂની કમનસીબ ઘટના સાથે કરી છે. આ મામલે MSHRC ના સ્પેશિયલ આઈજી દત્તા કરાલેના નેતૃત્વ હેઠળ એક વિશેષ તથ્ય-શોધ (Fact-Finding) સમિતિની રચના કરવામાં આવી છે. આ સમિતિએ ભારતી વિદ્યાપીઠ પોલીસ સ્ટેશનની મુલાકાત લઈને તપાસ હાથ ધરી છે અને એક અઠવાડિયામાં પોતાનો વિગતવાર અહેવાલ રજૂ કરવાનો રહેશે. ઉચ્ચ સુપરવાઇઝરી અધિકારીઓની ભૂમિકા અને બેદરકારી સામે પંચના આ આકરા વલણથી પોલીસ બેડામાં ભારે ચર્ચા જાગી છે.