મુંબઈ : મહારાષ્ટ્ર સરકારે રાજ્યના યુવાનો માટે રોજગારીની તકોનો વ્યાપ વધારવા માટે એક મહત્ત્વકાંક્ષી યોજનાની જાહેરાત કરી છે. કૌશલ્ય વિકાસ, રોજગાર, ઉદ્યોગસાહસિકતા અને નવીનતા મંત્રી મંગલ પ્રભાત લોઢાએ બુધવારે જાહેરાત કરી હતી કે ૧ એપ્રિલ, ૨૦૨૬ થી ૩૧ માર્ચ, ૨૦૨૭ દરમિયાન સમગ્ર રાજ્યમાં ૧,૦૦૦થી વધુ રોજગાર મેળાઓનું આયોજન કરવામાં આવશે. મંત્રાલય ખાતે યોજાયેલી રાજ્ય-સ્તરીય રોજગાર મેળા સમિતિની બેઠક દરમિયાન તેમણે સ્પષ્ટ કર્યું હતું કે સરકાર આ ભરતી અભિયાનની માહિતી દરેક જિલ્લા અને તાલુકાના અંતરિયાળ વિસ્તારો સુધી પહોંચાડવા માટે કટિબદ્ધ છે.

આ પહેલ હેઠળ માત્ર ITI ના વિદ્યાર્થીઓ જ નહીં, પરંતુ કોલેજના યુવાનો, કૌશલ્યની તકો શોધતા ઉમેદવારો અને સામાજિક સંગઠનો સાથે જોડાયેલા યુવાનોને પણ આવરી લેવામાં આવશે. રોજગાર મેળાઓમાં યુવાનોની પસંદગી દર વધારવા માટે સરકારે બે સપ્તાહના પૂર્વ-રોજગાર તાલીમ મોડ્યુલની યોજના બનાવી છે. જેના પ્રથમ સપ્તાહમાં યુવાનોને વ્યક્તિત્વ વિકાસ, રેઝ્યૂમે રાઇટિંગ, કોમ્યુનિકેશન સ્કિલ્સ અને કાર્યસ્થળના શિષ્ટાચાર અંગે તાલીમ અપાશે, જ્યારે બીજા સપ્તાહમાં ઇલેક્ટ્રિકલ, પ્લમ્બિંગ, માર્કેટિંગ અને રિસેપ્શન જેવી વ્યવહારુ કૌશલ્ય તાલીમ પૂરી પાડવામાં આવશે.

મંત્રી લોઢાએ અધિકારીઓને સૂચના આપી હતી કે માત્ર મેળાઓનું આયોજન કરવાને બદલે પૂર્વ-પ્લેસમેન્ટ તાલીમ પર ભાર મૂકવો જરૂરી છે જેથી યુવાનોની રોજગાર ક્ષમતામાં સુધારો થઈ શકે. બેઠક દરમિયાન કૌશલ્ય વિકાસ કમિશનર ડૉ. અમિત સૈનીએ આ સમગ્ર પ્રોજેક્ટનો રોડમેપ રજૂ કર્યો હતો. સરકારે આ યોજનાને વધુ પરિણામલક્ષી બનાવવા માટે નાગરિક સમાજ, ઉદ્યોગ જગત અને વિવિધ સંગઠનોને એકસાથે મળીને કામ કરવા અપીલ કરી છે.