નવી દિલ્હી: તા.૦૬: કલ્પના કરો કે તમે સેંકડો ફૂટની ઊંચાઈ પર હવામાં ઊભા છો, તમારા પગ નીચે માત્ર એક પારદર્શક કાચ છે અને નીચે ઊંડી ભયાનક ખીણ દેખાઈ રહી છે! જો આ કલ્પના માત્રથી જ તમારા રૂંવાડા ઊભા થઈ જતા હોય, તો ભારતમાં આવેલા એડવેન્ચરથી ભરપૂર 'ગ્લાસ સ્કાયવોક' (કાચના પુલ) તમારા માટે જ બન્યા છે. પ્રકૃતિની સુંદરતાની સાથે સાથે રોમાંચનો અનોખો અનુભવ આપતા આ સ્કાયવોક પર ચાલવા માટે મજબૂત હૃદય અને ભારે હિંમતની જરૂર પડે છે.

સાહસિક પ્રવાસીઓ માટે આ સ્થળો અત્યંત લોકપ્રિય બની રહ્યા છે. ભલે ગમે તેટલો હિંમતવાન માણસ હોય, પણ આ કાચના પુલ પર પહેલું પગલું મૂકતી વખતે એકવાર તો પરસેવો છૂટી જ જાય છે. પરંતુ એકવાર તમે આ ડર પર વિજય મેળવી લો, એટલે એવું લાગે છે કે તમે જાણે આકાશમાં મુક્તપણે સફર કરી રહ્યા છો.

સિક્કિમનું વિશ્વપ્રસિદ્ધ પેલિંગ સ્કાયવોક
ભારતના ઉત્તર-પૂર્વમાં આવેલું સિક્કિમ રાજ્ય પોતાની પ્રાકૃતિક સુંદરતા માટે જાણીતું છે. અહીં આવેલું 'પેલિંગ સ્કાયવોક' દેશના સૌથી પ્રખ્યાત અને આકર્ષક કાચના પુલોમાંનું એક ગણાય છે. આ સ્કાયવોકની સૌથી મોટી ખાસિયત એ છે કે તેના પરથી વિશ્વના સૌથી ઊંચા પર્વત શિખરોમાં સ્થાન પામતા 'કંચનજંગા'નો ભવ્ય અને મંત્રમુગ્ધ કરી દે તેવો નજારો જોવા મળે છે. જો તમે જીવનમાં કંઈક નવું અને ક્યારેય ન ભૂલાય તેવું એડવેન્ચર કરવા માંગતા હોવ, તો આ સ્થળ તમારા માટે શ્રેષ્ઠ વિકલ્પ છે.

દેશના આવા ગ્લાસ સ્કાયવોક પર મુલાકાત લેવી એ માત્ર એક પ્રવાસ નથી, પરંતુ ડર સામે જીત મેળવીને પ્રકૃતિના ખોળામાં હવામાં તરવાનો એક અદ્ભુત રોમાંચક અનુભવ છે.