મુંબઈ : બોમ્બે હાઈકોર્ટના હસ્તક્ષેપ અને કડક રૂખ બાદ ઈન્ડિયન મેડિકલ એસોસિએશન (IMA) એ ડૉક્ટરોની ચાલુ હડતાળ પાછી ખેંચવાની સત્તાવાર જાહેરાત કરી છે. હાઈકોર્ટે રાજ્યમાં ડૉક્ટરોની હડતાળ અને તેને કારણે ખોરવાયેલી તબીબી સેવાઓની ખુદ (સુઓમોટો) નોંધ લઈને તાકીદની સુનાવણી હાથ ધરી હતી, જે બાદ IMA ના વકીલે કોર્ટ સમક્ષ આંદોલન સમેટી લેવાની ખાતરી આપી હતી.

કોર્ટના આ પગલાથી મહારાષ્ટ્રની સરકારી અને ખાનગી હોસ્પિટલોમાં છેલ્લા કેટલાક સમયથી ઠપ થઈ ગયેલી સામાન્ય આરોગ્ય અને ઈમરજન્સી સેવાઓ પુનઃસ્થાપિત થવાનો માર્ગ મોકળો થયો છે, જેનાથી હજારો દર્દીઓ અને તેમના પરિવારોને ભારે રાહત મળી છે.

હાઈકોર્ટે નોટિસ ફટકારી હાથ ધરી સુનાવણી
સુનાવણી દરમિયાન બોમ્બે હાઈકોર્ટે આંદોલનની ગંભીરતાને ધ્યાનમાં રાખીને ઈન્ડિયન મેડિકલ એસોસિએશન (IMA), મહારાષ્ટ્ર એસોસિએશન ઓફ રેસિડેન્ટ ડૉક્ટર્સ (MARD) અને મહારાષ્ટ્ર સરકારને નોટિસ ફટકારી હતી. અદાલતે સ્પષ્ટ કર્યું હતું કે હડતાળના કારણે સામાન્ય જનતા અને દર્દીઓને અસહ્ય હાલાકી ભોગવવી પડી રહી છે.

કોર્ટની કડક વલણ ભરેલી ટિપ્પણીઓ બાદ IMA ના પ્રતિનિધિઓએ ચર્ચા કરી હડતાળ તુરંત અસરથી પૂરી કરવાનો નિર્ણય લીધો હતો. આ કેસ સંદર્ભે વધુ વિગતો અને કોર્ટના આખરી આદેશોની રાહ જોવાઈ રહી છે.