નવી દિલ્હી:  ચીન (LAC) અને પાકિસ્તાન (LOC) સાથેની અતિ સંવેદનશીલ સરહદો પર પોતાની સૈન્ય તાકાત અને પહોંચને અભૂતપૂર્વ ઊંચાઈએ લઈ જવા માટે ભારતીય સેનાએ અત્યાર સુધીનું સૌથી મોટું કદમ ઉઠાવ્યું છે. સંરક્ષણ મંત્રાલયે સરહદી વિસ્તારોમાં માલસામાનની હેરફેર માટે ૨,૭૧૫ અત્યાધુનિક લોજિસ્ટિક્સ ડ્રોન ખરીદવાની પ્રક્રિયા સત્તાવાર રીતે શરૂ કરી દીધી છે. ૨૦૨૨ અને ૨૦૨૫ના સફળ ટ્રાયલ્સ બાદ હિમાલયના અત્યંત દુર્ગમ વિસ્તારોમાં તૈનાત ભારતીય જવાનો સુધી રાશન, દારૂગોળો અને મેડિકલ કિટ્સ પહોંચાડવા માટે આ ડ્રોન સિસ્ટમ એક ગેમ-ચેન્જર સાબિત થશે.

આ પ્રસ્તાવિત ડ્રોન કાફલો ૬,૦૦૦ થી ૨૦,૦૦૦ ફૂટ સુધીની અતિશય ઊંચાઈ ધરાવતા વિસ્તારોમાં કામગીરી કરવા સક્ષમ હશે. માઇનસ ૩૦ ડિગ્રીની થીજવી દેતી ઠંડીથી લઈને ૫૦ ડિગ્રી સેલ્સિયસના આકરા તાપમાનમાં ૧,૦૦૦થી વધુ વખત સફળ લેન્ડિંગ કરી શકે તેવા આ ડ્રોનમાં લિડાર (LiDAR) નેવિગેશન, ડે-નાઇટ થર્મલ કેમેરા અને એન્ટી-જામિંગ ટેકનોલોજી ઉમેરવામાં આવી છે. યુદ્ધ કે કટોકટીના સમયે દુશ્મનો દ્વારા સપ્લાય રૂટ બ્લોક કરવામાં આવે તો પણ, ૧૦ થી ૨૦ કિલોમીટરની રેન્જમાં સૈનિકો સુધી કોઈપણ જોખમ વિના સપ્લાય ચાલુ રાખી શકાશે, જેનાથી પોર્ટર અને ખચ્ચર પરની નિર્ભરતા નાબૂદ થશે.

ભારતીય એર ડિફેન્સ સિસ્ટમ ભૂલથી પોતાના જ ડ્રોનને દુશ્મનનું વિમાન ન સમજી બેસે તે માટે આ ડ્રોનમાં ખાસ આઈએફએફ (IFF) સિસ્ટમ અને ઓટોનોમસ રિટર્ન-ટુ-હોમ મોડ સામેલ કરાયા છે. ૨,૭૧૫ ડ્રોનની આ મેગા ખરીદી દર્શાવે છે કે ભારતીય સેના હવે માનવરહિત સપ્લાય નેટવર્કને પોતાની યુદ્ધ રણનીતિનો મુખ્ય સ્તંભ બનાવી ચૂકી છે. ઉત્તરીય સરહદો પર વિષમ પરિસ્થિતિઓમાં દેશની રક્ષા કરતા વીર જવાનો માટે આ ક્રાંતિકારી ટેકનોલોજી એક સશક્ત 'લાઈફલાઈન' સાબિત થશે.