લખનૌ  :  ઉત્તર પ્રદેશની યોગી આદિત્યનાથ સરકારે ૨૦૨૭ની વિધાનસભા ચૂંટણીને લક્ષ્યમાં રાખીને અત્યારથી જ યુવા વર્ગને સાધવાની તૈયારીઓ તેજ કરી દીધી છે. રાજ્યના Gen-Z એટલે કે ૧૬ થી ૩૫ વર્ષની વયના યુવાનો માટે એક આધુનિક અને સમર્થ 'નવી યુવા નીતિ' તૈયાર કરવા માટે મુખ્યમંત્રીએ ઉચ્ચ સ્તરીય બેઠક યોજી છે. આ નીતિની સૌથી મોટી ખાસિયત એ છે કે તેને બંધ ઓરડામાં અધિકારીઓ દ્વારા નહીં, પરંતુ રાજ્યના યુવાનો પાસેથી સીધા સૂચનો અને ઇનપુટ્સ મેળવીને ઘડવામાં આવશે. મુખ્યમંત્રી યોગી આદિત્યનાથના મતે આ નીતિ ઉત્તર પ્રદેશના યુવાનો માટે આત્મનિર્ભરતાનો નવો સૂર્યોદય સાબિત થશે.

નવી યુવા નીતિ હેઠળ મુખ્યત્વે શિક્ષણ, કૌશલ્ય વિકાસ અને નવી રોજગારીની તકો ઊભી કરવા પર વિશેષ ધ્યાન કેન્દ્રિત કરવામાં આવ્યું છે. રાજ્યમાં ઔદ્યોગિક ક્રાંતિ લાવવા અને યુવાનોને સ્થાનિક સ્તરે જ નોકરીઓ પૂરી પાડવા માટે "સરદાર વલ્લભભાઈ પટેલ ઔદ્યોગિક અને રોજગાર ક્ષેત્ર" ની સ્થાપના કરવાની મહત્વકાંક્ષી જાહેરાત કરવામાં આવી છે. આ ઉપરાંત, સ્પર્ધાત્મક પરીક્ષાઓની તૈયારી કરતા વિદ્યાર્થીઓને આર્થિક રીતે મદદ કરવા માટે રાજ્યની તમામ સરકારી અને ખાનગી યુનિવર્સિટીઓમાં "મુખ્યમંત્રી અભ્યુદય કોચિંગ યોજના"નો વિસ્તાર કરવામાં આવશે, જેથી દરેક વર્ગના હોંશિયાર યુવાનો પોતાના સપના સાકાર કરી શકે.

આ નીતિના અમલીકરણ અને દેખરેખ માટે એક સ્વતંત્ર નિષ્ણાત કમિશનની સ્થાપના કરવામાં આવશે, જે યુવા કલ્યાણકારી યોજનાઓની રૂપરેખા તૈયાર કરશે. આ સાથે જ યોગી સરકારે યુવા ધનને નશા મુક્ત રાખવા અને રાજ્યમાં સ્પોર્ટ્સ કલ્ચરને પ્રોત્સાહન આપવા માટે ખાસ યોજનાઓ ઘડી છે. રમતગમતમાં યુવાનોની ભાગીદારી વધારીને તેમને આત્મનિર્ભર અને ભવિષ્યના વૈશ્વિક પડકારો માટે સક્ષમ બનાવવાનો આ નીતિનો મુખ્ય ઉદ્દેશ્ય છે, જે ઉત્તર પ્રદેશના રાજકીય અને સામાજિક સમીકરણોમાં મોટો ફેરફાર લાવી શકે છે.