જયપુર : રાજસ્થાનમાં આગામી ૭ ઓગસ્ટથી ચોમાસું ફરી એકવાર સક્રિય થઈ રહ્યું છે અને હવામાનમાં મોટો બદલાવ જોવા મળશે. જયપુર હવામાન કેન્દ્રના જણાવ્યા અનુસાર, પૂર્વ રાજસ્થાનમાં વરસાદની ગતિવિધિઓમાં ભારે વધારો થવાની સંભાવના છે. ખાસ કરીને ભરતપુર, જયપુર, કોટા, અજમેર અને ઉદયપુર સંભાગના વિવિધ વિસ્તારોમાં ધોધમાર વરસાદ વરસી શકે છે. ૭ થી ૯ ઓગસ્ટ દરમિયાન કોટા અને ઉદયપુર વિભાગના કેટલાક વિસ્તારોમાં અતિભારે વરસાદની આગાહી કરવામાં આવી છે, જેને ધ્યાનમાં રાખીને તંત્ર પણ એલર્ટ થઈ ગયું છે.

હવામાન વિભાગની ચેતવણી અનુસાર, બારન, બુંદી, ઝાલાવાડ, કરૌલી, ધોલપુર અને કોટા જિલ્લાઓમાં ભારે વરસાદ અને ૩૦ થી ૪૦ કિમી પ્રતિ કલાકની ઝડપે પવન ફૂંકાવાને લઈને ઓરેન્જ એલર્ટ જારી કરવામાં આવ્યું છે. જ્યારે અજમેર, અલવર, જયપુર, ભીલવાડા, ચિત્તોડગઢ અને સવાઈ માધોપુર સહિતના ૧૪ જેટલા જિલ્લાઓમાં યલો એલર્ટ આપવામાં આવ્યું છે. નીચાણવાળા વિસ્તારોમાં પાણી ભરાવાની શક્યતા હોવાથી નાગરિકોને સાવચેત રહેવાની સલાહ આપવામાં આવી છે.

પશ્ચિમ રાજસ્થાનમાં સામાન્ય વરસાદ જ્યારે પૂર્વમાં રહેશે મેઘરાજાનો પ્રકોપ

પશ્ચિમ રાજસ્થાનના બિકાનેર અને જોધપુર સંભાગમાં છૂટાછવાયા સ્થાનો પર હળવાથી મધ્યમ વરસાદની સંભાવના છે, પરંતુ ત્યાં ભારે વરસાદનું કોઈ જોખમ નથી. બાંસવાડા, રાજસમંદ, જેસલમેર અને જોધપુર જેવા કેટલાક જિલ્લાઓમાં કોઈ ચેતવણી જારી કરવામાં આવી નથી જ્યાં હવામાન સામાન્ય રહેશે. હવામાન વિભાગે લોકોને ચેતવણી આપી છે કે આ પ્રતિકૂળ વાતાવરણ અને ગાજવીજ દરમિયાન તેઓ ખુલ્લા ખેતરો, વૃક્ષો અને વીજળીના થાંભલાઓથી દૂર રહે.