નવી દિલ્હી: તા.૦૭: વિમાન કંપની એર ઇન્ડિયાએ મુસાફરો માટે મોટા સમાચાર આપતાં જુલાઈ અને ઓગસ્ટ દરમિયાન સ્થગિત કરાયેલી પોતાની મોટાભાગની ફ્લાઇટ સેવાઓ ૧ સપ્ટેમ્બરથી પુનઃસ્થાપિત કરવાની જાહેરાત કરી છે. કંપનીના આંતરિક મેમો અનુસાર, એરલાઇન આગામી શિયાળાના શિડ્યુલ દરમિયાન પોતાના વૈશ્વિક નેટવર્કનો વિસ્તાર કરવા જઈ રહી છે, જેમાં મહત્વપૂર્ણ આંતરરાષ્ટ્રીય રૂટ્સ પર ફ્લાઇટ્સની સંખ્યા (ફ્રીક્વન્સી) વધારવામાં આવશે.

અગાઉ વિમાન ઇંધણ (ATF) ના વધતા ભાવ અને ઓપરેશનલ પડકારોને કારણે એર ઇન્ડિયાએ કામચલાઉ ધોરણે પોતાની ક્ષમતામાં કાપ મૂક્યો હતો. જૂનથી ઓગસ્ટ વચ્ચે કંપનીએ આંતરરાષ્ટ્રીય ક્ષમતામાં ૨૭% નો ઘટાડો કરીને આશરે ૧૦૦ જેટલી ફ્લાઇટ્સ રદ કરી હતી, જેમાં દિલ્હી-શિકાગો, મુંબઈ-ન્યૂ યોર્ક, દિલ્હી-નેવાર્ક અને ચેન્નાઈ-સિંગાપોર જેવા મુખ્ય રૂટ્સ પ્રભાવિત થયા હતા. આ ઉપરાંત સ્થાનિક (ડોમેસ્ટિક) ફ્લાઇટ્સમાં પણ ૨૦ થી ૨૨ ટકાનો કાપ મુકાતાં સાપ્તાહિક ૭૯૦ થી વધુ ફ્લાઇટ્સ બંધ કરવી પડી હતી.

હવે સ્થિતિ સામાન્ય થતાં એર ઇન્ડિયા ભારતને મિલાન, ફ્રેન્કફર્ટ, ઝ્યુરિચ, વિયેના, મેલબોર્ન, ટોક્યો અને ન્યૂ યોર્ક જેવા વૈશ્વિક શહેરો સાથે જોડતા રૂટ્સ પર વધારાની ફ્લાઇટ્સ શરૂ કરવા જઈ રહી છે. સેવાઓ પુનઃસ્થાપિત કરવાનો આ નિર્ણય દર્શાવે છે કે આગામી તહેવારો અને શિયાળાની ટ્રાવેલ સીઝનમાં મુસાફરોની માંગ મજબૂત રહેશે.

જોકે, ભારે ઓપરેશનલ ખર્ચને કારણે એરલાઇન હજુ પણ નાણાકીય દબાણ હેઠળ છે. સિંગાપોર એરલાઇન્સ ગ્રુપના વાર્ષિક અહેવાલ મુજબ, માર્ચ ૨૦૨૬ માં પૂરા થયેલા નાણાકીય વર્ષ દરમિયાન એર ઇન્ડિયાએ SGD ૩.૫૬ બિલિયન (રૂ. ૨૬,૭૦૦ કરોડથી વધુ) નું નુકસાન નોંધાવ્યું હતું. તેમ છતાં, નેટવર્ક વિસ્તરણ દ્વારા કંપની પોતાના મહેસૂલમાં વધારો કરવાની યોજના બનાવી રહી છે.