નવી દિલ્હી : જો તમે અને તમારા જીવનસાથી ઘરબેઠા દર મહિને એક નિશ્ચિત અને સુરક્ષિત માસિક આવક મેળવવા માંગતા હોવ, તો પોસ્ટ ઓફિસની માસિક આવક યોજના (POMIS) એક અત્યંત ફાયદાકારક વિકલ્પ સાબિત થઈ શકે છે. આ સ્કીમ હેઠળ પતિ-પત્ની સંયુક્ત (Joint) ખાતું ખોલાવીને મહત્તમ રોકાણ પર આગામી ૫ વર્ષ સુધી દર મહિને ₹૯,૨૫૦ ની નિશ્ચિત આવક મેળવી શકે છે. ૧૮ વર્ષથી વધુ વયનો કોઈ પણ ભારતીય નાગરિક નજીકની પોસ્ટ ઓફિસમાં જઈને આ ખાતું ખોલાવી શકે છે.

વર્તમાન નિયમો અનુસાર પોસ્ટ ઓફિસની આ સ્કીમ પર વાર્ષિક ૭.૪ ટકા વ્યાજ આપવામાં આવી રહ્યું છે. જો પતિ-પત્ની મળીને સંયુક્ત ખાતામાં મહત્તમ ₹૧૫ લાખનું રોકાણ કરે છે, તો તેમને વાર્ષિક ₹૧,૧૧,૦૦૦ નું વ્યાજ મળે છે, જે હિસાબે દર મહિને ₹૯,૨૫૦ ની રકમ સીધી તેમના પોસ્ટ ઓફિસ સેવિંગ્સ એકાઉન્ટ કે લિંક્ડ બેંક ખાતામાં જમા થઈ જાય છે. આ યોજનાની મુદત ૫ વર્ષની છે અને મુદત પૂરી થતાં જ મૂળ રકમ પરત મળી જાય છે. યોજનામાં સિંગલ ખાતા માટે મહત્તમ રોકાણ મર્યાદા ₹૯ લાખ અને સંયુક્ત ખાતા માટે ₹૧૫ લાખ નક્કી કરવામાં આવી છે.

બીજી તરફ, કેન્દ્ર સરકારના કર્મચારીઓ અને પેન્શનરો માટે પણ એક મોટો રાહતના સમાચાર સામે આવ્યા છે. જુલાઈ ૨૦૨૬ ના મોંઘવારી ભથ્થા (DA) ના વધારા માટે જરૂરી CPI-IW આંકડા જાહેર થઈ ગયા છે, જે દર્શાવે છે કે કેન્દ્રીય કર્મચારીઓના ડીએમાં ૩% નો વધારો થઈ શકે છે. આ સુધારા બાદ કર્મચારીઓનું મોંઘવારી ભથ્થું ૬૦% થી વધીને ૬૩% થઈ જશે.

૮મા પગાર પંચની ભલામણો અમલમાં આવે તે પહેલાં ૭મા પગાર પંચ હેઠળ આ છેલ્લો મોટો ડીએ વધારો માનવામાં આવી રહ્યો છે. ૧ કરોડથી વધુ કેન્દ્રીય કર્મચારીઓ અને પેન્શનરોને આ વધારાનો સીધો લાભ મળશે, જેનાથી તેમના માસિક પગાર અને પેન્શનમાં નોંધપાત્ર ઉમેરો થશે.