પુણે : મહારાષ્ટ્ર ફૂડ એન્ડ ડ્રગ એડમિનિસ્ટ્રેશન (FDA) એ રાજ્યભરના વિદ્યાર્થીઓના આરોગ્ય સુરક્ષાને ધ્યાને રાખીને એક અત્યંત મહત્વપૂર્ણ નિર્ણય લીધો છે. શાળા પરિસરના ૫૦ મીટરના અંતરમાં જંક ફૂડ અને બિનઆરોગ્યપ્રદ ખોરાકના વેચાણ પર સખત પ્રતિબંધ લાદવામાં આવ્યો છે. FDA કમિશનર તુકારામ મુંધેએ પુણે ખાતે આયોજિત એક કાર્યક્રમ દરમિયાન સ્પષ્ટ ચેતવણી આપી છે કે, આ પ્રતિબંધિત વિસ્તારમાં જંક ફૂડ વેચતા મળી આવનારા વિક્રેતાઓ અને દુકાનદારોના લાયસન્સ તાત્કાલિક અસરથી રદ કરવામાં આવશે.

પુણેના બાલ ગંધર્વ રંગમંદિર ખાતે યોજાયેલા જાહેર સંવાદ દરમિયાન તુકારામ મુંધેએ જણાવ્યું હતું કે, વિદ્યાર્થીઓનું સ્વાસ્થ્ય અને તેમનું ભવિષ્ય દેશ માટે સર્વોપરી છે. જો બાળકોનું સ્વાસ્થ્ય સારું રહેશે તો જ દેશ પ્રગતિ કરશે. આ પ્રતિબંધને કડકપણે અમલમાં મૂકવા માટે FDA વિભાગની સાથે શાળા વ્યવસ્થાપન સમિતિઓ, શિક્ષણ વિભાગ, સ્થાનિક સત્તામંડળો અને વાલીઓને પણ સામેલ કરવામાં આવશે. જંક ફૂડ ઉપરાંત હવે રસ્તા પર ચાલતા ચાઇનીઝ ફૂડ સ્ટોલ પણ FDA ની ફ્લાઇંગ સ્કવોડની તપાસ હેઠળ આવશે.

હાલમાં સાંગલી, સતારા જેવા અનેક જિલ્લાઓમાં સ્ટાફની ભારે અછત હોવાનો સ્વીકાર કરતા કમિશનરે જણાવ્યું હતું કે, તબક્કાવાર નવી ભરતીઓ કરવામાં આવી રહી છે. ત્યાં સુધી ઉપલબ્ધ માનવબળનો કાર્યક્ષમ ઉપયોગ, આધુનિક ટેકનોલોજી અને વિશેષ ટીમ બનાવીને ભેળસેળ કરનારાઓ સામે દરોડા પાડવામાં આવશે. ઉલ્લેખનીય છે કે, મહારાષ્ટ્રમાં ભેળસેળયુક્ત ખાદ્ય પદાર્થો અને અસુરક્ષિત એનાલોગ પનીરના વેચાણ પર પણ એક વર્ષ માટે પ્રતિબંધ મૂકવામાં આવ્યો છે.

સંવાદ દરમિયાન તુકારામ મુંધેએ પોતાની યુપીએસસી (UPSC) પરીક્ષાની તૈયારીના દિવસો અને દિલ્હીના પ્રવાસના રોચક અનુભવો પણ શેર કર્યા હતા. તેમણે ઉમેર્યું હતું કે એક સમયે તેઓ સ્ટ્રીટ ફૂડ ખાતા હતા પરંતુ હવે ખાદ્ય સુરક્ષાના ધોરણોને ધ્યાને રાખીને તે સંપૂર્ણપણે ટાળે છે. શાળાઓ આસપાસ જંક ફૂડ પરના આ કડક નિર્ણયથી વિદ્યાર્થીઓના સ્વાસ્થ્યમાં સુધારો થશે તેવી આશા વ્યક્ત કરવામાં આવી રહી છે.