મોસ્કો : રશિયાના મોસ્કો સ્થિત શેરેમેટ્યેવો ઇન્ટરનેશનલ એરપોર્ટ પર સુરક્ષા વ્યવસ્થાને કોરાણે મૂકીને હાઇડ્રામા સર્જતી એક અનોખી ઘટના સામે આવી છે. પોતાની નિર્ધારિત એરોફ્લોટ (Aeroflot) ફ્લાઇટ ચૂકી ગયા બાદ તેને પકડવાની ઘેલછામાં બે મહિલા મુસાફરો એરપોર્ટના તમામ સુરક્ષા નિયમો તોડીને સીધી પ્રતિબંધિત એરક્રાફ્ટ એપ્રોન (રનવે નજીકનો વિસ્તાર) પર દોડી ગઈ હતી. આ ઘટનાનો વીડિયો સોશિયલ મીડિયા પર વાયરલ થતાં એરપોર્ટ સુરક્ષા સામે અનેક સવાલો ઉભા થયા છે.

રિપોર્ટ અનુસાર, આ ઘટના ત્યારે બની જ્યારે બંને મહિલા મુસાફરો ફ્લાઇટના નિર્ધારિત સમય કરતાં ખૂબ જ મોડી પહોંચી હતી. બોર્ડિંગ બંધ થઈ ગયું હોવાથી એરલાઇન સ્ટાફ પાસે મદદ માંગવા અથવા ફ્લાઇટ રીબુક કરાવવાને બદલે, આ મહિલાઓએ પોતે જ વિમાન સુધી પહોંચવાનો સાહસિક પરંતુ ખતરનાક નિર્ણય લીધો. એક મહિલા તો હાથમાં સુટકેસ ઘસડતી ઘસડતી રનવે પર ટેક-ઓફ માટે તૈયાર થઈ રહેલા પ્લેન તરફ દોડતી જોવા મળી હતી.

જે સમયે મહિલાઓ એરક્રાફ્ટ પાસે પહોંચી ત્યારે વિમાનને ટોઇંગ (ખેંચવાની) કામગીરી ચાલી રહી હતી. કોઈ મોટી દુર્ઘટના કે અથડામણ ન સર્જાય તે માટે ગ્રાઉન્ડ સ્ટાફે તાત્કાલિક ધોરણે ટોઇંગ ઓપરેશન રોકી દીધું હતું. ત્યારબાદ એરપોર્ટની સિક્યુરિટી અને પોલીસે ત્વરિત કાર્યવાહી કરીને બંને મહિલાઓને રનવે પરથી અટકાયતમાં લીધી હતી અને સુરક્ષિત રીતે એરપોર્ટ પરિસરની બહાર કાઢી હતી.

ઉલ્લેખનીય છે કે એરપોર્ટ એપ્રોન એ અત્યંત સંવેદનશીલ અને જોખમી વિસ્તાર હોય છે, જ્યાં વિમાનોમાં ઇંધણ ભરવું, સામાન લોડ કરવો અને હેવી મશીનરી ચલાવવાનું કામ થતું હોય છે. આવી સ્થિતિમાં વગર પરવાનગીએ પ્રવેશ કરવો એ જીવના જોખમ સમાન છે. એરપોર્ટ સત્તાવાળાઓએ આ ઘટના બાદ સુરક્ષા પ્રોટોકોલ વધુ કડક બનાવ્યા છે અને નિયમોનું ઉલ્લંઘન કરનાર મુસાફરો સામે કાનૂની કાર્યવાહી હાથ ધરી છે.