નવી મુંબઈ : મહારાષ્ટ્ર સરકાર અને સિડકો (CIDCO) દ્વારા પૂર્વોત્તરના નાગરિકોની સુવિધા કાજે એક મહત્વપૂર્ણ નિર્ણય લેવામાં આવ્યો છે. નવી મુંબઈના ખારઘર સ્થિત સેક્ટર ૧૬ માં 'મેઘાલય હાઉસ-II' ના નિર્માણ માટે જમીનનો પ્લોટ ઔપચારિક રીતે મેઘાલય સરકારને સોંપવામાં આવ્યો છે. ડીએવી ઇન્ટરનેશનલ સ્કૂલ નજીક આયોજિત શિલાન્યાસ અને દસ્તાવેજ હસ્તાંતરણ સમારોહમાં મહારાષ્ટ્રના મુખ્યમંત્રી દેવેન્દ્ર ફડણવીસ અને મેઘાલયના મુખ્યમંત્રી કોનરાડ કે. સંગમા સહિત બંને રાજ્યો અને સિડકોના ઉચ્ચ અધિકારીઓ ઉપસ્થિત રહ્યા હતા.

હાલમાં વાશી ખાતે કાર્યરત મેઘાલય હાઉસની ક્ષમતા મર્યાદિત હોવાના કારણે મુંબઈ આવતા મુસાફરો, દર્દીઓ, વિદ્યાર્થીઓ અને કારોબારીઓને રહેવાની મુશ્કેલી પડતી હતી. આ નવી સુવિધા દ્વારા મેઘાલયથી સારવાર માટે આવતા દર્દીઓ, અભ્યાસ કરતા વિદ્યાર્થીઓ અને કલાકારોને ઘર જેવું સુરક્ષિત વાતાવરણ પૂરું પાડવામાં આવશે. મેઘાલયના મુખ્યમંત્રી કોનરાડ સંગમાએ આ સહયોગ બદલ મહારાષ્ટ્ર સરકારનો આભાર માનતા જણાવ્યું હતું કે, આ માત્ર એક ઇમારત નથી પરંતુ પશ્ચિમ ભારત અને ઈશાન ભારત વચ્ચે સંસ્કૃતિ, પર્યટન અને હસ્તકલાના આદાન-પ્રદાન માટેનું એક મજબૂત દ્વાર બનશે.

સમારોહ દરમિયાન મુખ્યમંત્રી દેવેન્દ્ર ફડણવીસે જણાવ્યું હતું કે, વડાપ્રધાન નરેન્દ્ર મોદીના 'એક ભારત, શ્રેષ્ઠ ભારત' ના વિઝન હેઠળ આ પ્રોજેક્ટ બંને રાજ્યો વચ્ચેના આંતરિક સંબંધોને વધુ ગાઢ બનાવશે. તેમણે ઉમેર્યું કે મુંબઈ અને પુણે પૂર્વોત્તરના યુવાનો માટે શિક્ષણ અને રોજગારીનું પ્રિય સ્થળ બની રહ્યા છે. મેઘાલયને 'પૂર્વનું સ્કોટલેન્ડ' ગણાવતા તેમણે કહ્યું કે, સંગીત મેઘાલયનો આત્મા છે અને મુંબઈ દેશના સંગીત ઉદ્યોગનું કેન્દ્ર છે, જે બંને પ્રદેશોને ભાવનાત્મક રીતે જોડે છે.

ફડણવીસે ખારઘર અને નવી મુંબઈ પટ્ટાને ભારતના આગામી આર્થિક વિકાસનું મુખ્ય એન્જિન ગણાવ્યું હતું. નવી મુંબઈ આંતરરાષ્ટ્રીય એરપોર્ટ, એજ્યુ-સિટી, મેડી-સિટી અને ડેટા સેન્ટર્સના વિકાસ સાથે આગામી ૧૦ થી ૧૫ વર્ષમાં આ સ્થળનું મહત્વ અનેકગણું વધી જશે. પ્રોજેક્ટને ઝડપથી અને ગુણવત્તાસભર રીતે પૂર્ણ કરવા માટે મહારાષ્ટ્ર સરકારે સિડકો મારફતે બાંધકામ ક્ષેત્રે પણ તમામ સહયોગ આપવાની તૈયારી દર્શાવી છે.