મુંબઈ : આર્થિક પાટનગર મુંબઈના દહિસર વિસ્તારમાંથી સાયબર ઠગાઈનો એક અત્યંત ચોંકાવનારો અને આંખ ઉઘાડનારો કિસ્સો સામે આવ્યો છે. અહીં મહાનગર ગૅસ લિમિટેડ (MGL) ના અધિકારી બનીને સાયબર ગુનેગારોએ એક ૬૮ વર્ષીય વૃદ્ધને ગેસ કનેક્શન બંધ કરી દેવાની ધમકી આપી હતી. ત્યારબાદ બિલ અપડેટ અને કેવાયસી (KYC) કરાવવાના નામે એક શંકાસ્પદ APK ફાઈલ મોકલીને વૃદ્ધના મોબાઈલનું રિમોટ એક્સેસ મેળવી લીધું હતું અને તેમના બેંક એકાઉન્ટમાંથી તબક્કાવાર કુલ ₹૯,૯૮,૩૬૭ ઉપાડી લીધા હતા.

આ મામલે દહિસર પોલીસે ટેકનિકલ તપાસ અને બેંકિંગ ટ્રાન્ઝેક્શન ડેટાના આધારે દરોડો પાડીને ઠગાઈના નાણાં પોતાના બેંક ખાતાઓમાં મેળવનાર ૨૧ વર્ષીય આર્યન રાજેશ ગુપ્તા (રહે. જોગેશ્વરી) અને ૨૪ વર્ષીય અંકિત સંજય તિવારી (રહે. વસઈ)ની ધરપકડ કરી લીધી છે. તપાસમાં બહાર આવ્યું છે કે આર્યન ગુપ્તાના કેનરા બેંક ખાતામાં ₹૩,૪૯,૮૫૬ અને અંકિત તિવારીના ICICI બેંક ખાતામાં ₹૨,૦૦,૦૦૦ ટ્રાન્સફર કરવામાં આવ્યા હતા. આ આરોપીઓ સાયબર ફ્રોડથી મેળવેલી રકમને અલગ-અલગ માધ્યમોથી ઉપાડીને સગેવગે કરવાનું કામ કરતા હતા.

મુંબઈ પોલીસે આ ઘટના બાદ નાગરિકો માટે ખાસ ચેતવણી જારી કરી છે. પોલીસે સ્પષ્ટ કર્યું છે કે કોઈપણ અજાણી વ્યક્તિ દ્વારા વોટ્સએપ કે એસએમએસ પર મોકલવામાં આવેલી APK ફાઈલ ભૂલથી પણ ડાઉનલોડ કરવી નહીં. સરકારી કે ખાનગી કંપનીઓ ક્યારેય આ રીતે APK ફાઈલ મોકલીને બિલ અપડેટ કે KYC કરતી નથી. જો કોઈ વ્યક્તિ સાથે આવો સાયબર ફ્રોડ થાય, તો ત્વરિત ૧૯૩૦ સાયબર હેલ્પલાઈન પર સંપર્ક કરીને પોતાની ફરિયાદ નોંધાવવી.