મુંબઈ:  મુંબઈ ક્રિકેટ એસોસિએશન (MCA) દ્વારા ભારતીય ક્રિકેટના દિગ્ગજ અને પૂર્વ ટેસ્ટ બેટ્સમેન સ્વ. દિલીપ સરદેસાઈની જન્મજયંતિ નિમિત્તે તેમને વિશેષ શ્રદ્ધાંજલિ અર્પણ કરવામાં આવી છે. આ પ્રસંગે મુંબઈના ઐતિહાસિક વાનખેડે સ્ટેડિયમ ખાતે "દિલીપ સરદેસાઈ ગેટ - ગેટ નંબર ૩" નું સ્મારક બોર્ડ વિધિવત રીતે લગાવવામાં આવ્યું હતું. આ કાર્યક્રમમાં MCA એપેક્સ કાઉન્સિલના સભ્યો, સ્વ. સરદેસાઈના પરિવારજનો, મિત્રો અને જાણીતા ક્રિકેટપ્રેમીઓ મોટી સંખ્યામાં ઉપસ્થિત રહ્યા હતા.

ભારતીય ક્રિકેટ અને મુંબઈના ડોમેસ્ટિક ક્રિકેટ વારસામાં દિલીપ સરદેસાઈનું યોગદાન અત્યંત અમૂલ્ય માનવામાં આવે છે. વાનખેડે સ્ટેડિયમ ખાતે તેમના નામે અગાઉ જ ગેટનું નામાભિધાન કરવામાં આવ્યું હતું, પરંતુ હવે ત્યાં આકર્ષક નેમબોર્ડ લગાવવામાં આવતાં સ્ટેડિયમમાં પ્રવેશતા દરેક ક્રિકેટ પ્રેમી અને ખેલાડીઓને તેમના સમૃદ્ધ વારસા અને ભારતીય ટેસ્ટ ક્રિકેટમાં આપેલી મહાન સેવાઓની સતત યાદ અપાવશે.

આ યાદગાર ક્ષણે MCA ના પ્રમુખ અજિંક્ય નાઈકે જણાવ્યું હતું કે, "દિલીપ સરદેસાઈ ભારતીય ક્રિકેટના એક મહાન નાયક હતા. ખાસ કરીને ૧૯૭૧ માં વેસ્ટ ઈન્ડિઝ સામેની ઐતિહાસિક ટેસ્ટ શ્રેણી જીતમાં તેમની મેચ-વિનિંગ બેટિંગ ભારતીય ક્રિકેટ ઇતિહાસનો સુવર્ણ અધ્યાય છે. તેમની જન્મજયંતિ પર વાનખેડે સ્ટેડિયમ ખાતે તેમના આ વારસાનું સન્માન કરવું એ અમારા માટે ગૌરવની વાત છે. આ સ્મારક બોર્ડ આવનારી પેઢીઓને ક્રિકેટ પ્રત્યે સમર્પણ અને ઉત્કૃષ્ટતાની પ્રેરણા આપશે."

અનાવરણ સમારોહ દરમિયાન ઉપસ્થિત સરદેસાઈ પરિવાર અને મિત્રોએ તેમની શાનદાર કારકિર્દી અને યાદગાર ક્ષણોને વાગોળી હતી. વાનખેડે સ્ટેડિયમ ખાતે ગેટ નંબર ૩ પર અનાવરણ કરાયેલું આ બોર્ડ મુંબઈના આ દિગ્ગજ ક્રિકેટરને યોગ્ય શ્રદ્ધાંજલિ પૂરી પાડે છે.