વોશિંગ્ટન : અમેરિકાના પૂર્વ રાષ્ટ્રપતિ જો બિડેનના સ્વાસ્થ્યને લઈને અત્યંત ચિંતાજનક અને ચોંકાવનારા સમાચાર સામે આવ્યા છે. તેમના પુત્ર હન્ટર બિડેને એક વ્યાપક ઇન્ટરવ્યુ દરમિયાન ભાવુક થઈને ખુલાસો કર્યો છે કે ૮૩ વર્ષીય જો બિડેનનું પ્રોસ્ટેટ કેન્સર હવે શરીરના અન્ય ભાગો અને ખાસ કરીને તેમના હાડકાં સુધી ફેલાઈ (મેટાસ્ટેસાઇઝ) ગયું છે. આ ગંભીર બીમારીના કારણે તેઓ અત્યંત અસહ્ય પીડા ભોગવી રહ્યા છે અને શારીરિક રીતે ખૂબ કમજોર થઈ ગયા છે.

હન્ટર બિડેને ખાસ વાતચીતમાં જણાવ્યું હતું કે તેમના પિતાની આવી હાલત જોવી પરિવાર માટે ભારે દુઃખદ અને પીડાસ્પદ છે. જોકે, આટલી ગંભીર સ્થિતિ અને શારીરિક મુશ્કેલીઓ હોવા છતાં, જો બિડેન કોઈ ફરિયાદ કર્યા વિના દેશ અને જાહેર હિતના મહત્વપૂર્ણ મુદ્દાઓ પર સતત સક્રિય રહીને પોતાનો અવાજ ઉઠાવી રહ્યા છે. તેઓ આજે પણ દેશના ભવિષ્યમાં દ્રઢ વિશ્વાસ ધરાવે છે અને પોતાનું કાર્ય ચાલુ રાખવાનો પ્રયાસ કરી રહ્યા છે.

અત્રે નોંધનીય છે કે, ૮૩ વર્ષીય જો બિડેન યુએસના ઇતિહાસમાં રાષ્ટ્રપતિ પદ સંભાળનારા સૌથી વયોવૃદ્ધ નેતા હતા. જાન્યુઆરી ૨૦૨૫ માં વ્હાઇટ હાઉસ છોડ્યાના ચાર મહિના બાદ, એટલે કે મે ૨૦૨૫ માં તેમણે પોતાના કેન્સરના નિદાન અંગે જાહેરમાં માહિતી આપી હતી. પોતાના કાર્યકાળ દરમિયાન સ્વાસ્થ્ય સંબંધી બાબતોને લઈને ટીકાઓનો સામનો કરી ચૂકેલા પૂર્વ રાષ્ટ્રપતિ ટૂંક સમયમાં જ "પ્રોમિસ મી, અમેરિકા" શીર્ષક હેઠળ પોતાના સંસ્મરણોનું પુસ્તક પણ પ્રકાશિત કરવા જઈ રહ્યા છે.