નવી દિલ્હી: કોમનવેલ્થ ગેમ્સ ૨૦૨૬ માં ભારતનું ત્રિરંગો ધ્વજ બુલંદ કરીને દેશ પરત ફરેલા વિજેતા એથ્લેટ્સનું રવિવાર, ૯ ઓગસ્ટના રોજ પ્રધાનમંત્રી નરેન્દ્ર મોદીએ ઉષ્માભર્યું સ્વાગત કર્યું હતું. પીએમ મોદીએ તેમના નિવાસસ્થાને તમામ મેડલ વિજેતાઓ સાથે રૂબરૂ મુલાકાત કરીને તેમને અભિનંદન પાઠવ્યા હતા. આ ખાસ ક્ષણને યાદગાર બનાવતા પ્રધાનમંત્રીએ પોતાના અધિકૃત ઇન્સ્ટાગ્રામ હેન્ડલ પરથી એક સ્પેશિયલ રીલ પણ શેર કરી હતી, જેમાં તેમણે ખેલાડીઓનો ઉત્સાહ વધારવાની સાથે સમગ્ર રાષ્ટ્રને રમતગમત પ્રત્યે જાગૃત કરતો એક નવો અને પ્રેરણાદાયી મંત્ર આપ્યો હતો.

સોશિયલ મીડિયા પર ઝડપથી વાયરલ થઈ રહેલી આ ૩૨ સેકન્ડની વીડિયો રીલમાં પીએમ મોદી ગોલ્ડ મેડલિસ્ટ બોક્સર સાક્ષી ચૌધરી અને અન્ય સફળ ખેલાડીઓ સાથે હળવી ક્ષણો વિતાવતા નજરે પડે છે. આ દ્રશ્યો વચ્ચે પ્રધાનમંત્રીએ દેશના યુવાનોને સંબોધતા કહ્યું, "જે પણ રમશે તે ખીલશે." આ સાથે જ તેમણે દેશવાસીઓને આહ્વાન કરતા ઉમેર્યું કે "હંમેશા ભારત માટે ચીયર કરો... ભારત માતા કી જય." પીએમ મોદીએ ઇન્સ્ટાગ્રામ પર આ રીલ પોસ્ટ કરતી વખતે #Cheer4India હેશટેગનો ઉપયોગ કરીને દેશના ખેલાડીઓની મહેનત અને જુસ્સાને બિરદાવ્યો હતો.

ઉલ્લેખનીય છે કે, કોમનવેલ્થ ગેમ્સ ૨૦૨૬ માં ભારતીય ખેલાડીઓએ અદ્ભુત પ્રદર્શન કરીને વિશ્વસ્તરે ભારતનો દબદબો કાયમ રાખ્યો છે. ભારતે ૧૩ ગોલ્ડ, ૧૭ સિલ્વર અને ૯ બ્રોન્ઝ સહિત કુલ ૩૯ મેડલ જીતીને મેડલ ટેલીમાં ચોથું સ્થાન પ્રાપ્ત કર્યું છે. આ સ્પર્ધામાં ખાસ કરીને ભારતીય બોક્સરોએ પોતાના પંચનો પાવર બતાવીને વિવિધ વજન વર્ગમાં ૭ ગોલ્ડ અને ૩ સિલ્વર સાથે કુલ ૧૦ મેડલ પોતાના નામે કર્યા હતા. CWG માં આ ઉત્કૃષ્ટ પ્રદર્શન બાદ હવે ભારતીય રમતવીરો અને દેશવાસીઓની નજર જાપાનમાં યોજાનારી આગામી એશિયન ગેમ્સ પર ટકેલી છે.4