બેંગલુરુ : કર્ણાટકમાં વિરોધ પક્ષના મુખ્ય ગઠબંધન ભાગીદારો ભારતીય જનતા પાર્ટી (BJP) અને જેડીએસ (JD-S) વચ્ચેનો આંતરિક અસંતોષ અને ખટરાગ હવે શેરીઓમાં આવી ગયો છે. બિદાદી ટાઉનશીપ પ્રોજેક્ટના વિરોધમાં જેડીએસ દ્વારા બિદાદીથી બેંગલુરુ સુધી યોજાયેલી પદયાત્રાથી ભાજપ પ્રમુખ બી વાય વિજયેન્દ્રએ માત્ર અંતર જ જાળવ્યું નથી, પરંતુ કોંગ્રેસ સરકારના મંત્રી મધુ બાંગરપ્પા સાથેની તેમની ખાનગી વાતચીતનો વિડીયો લીક થતાં બંને પક્ષો વચ્ચેનો આંતરિક યુદ્ધ ચરમસીમાએ પહોંચી ગયો છે.

લીક થયેલા વિડીયોમાં ભાજપના પ્રદેશ પ્રમુખ બી વાય વિજયેન્દ્ર શિવમોગા જિલ્લાના પ્રભારી મંત્રી મધુ બાંગરપ્પા સાથે આકસ્મિક વાતો કરતા જોવા મળે છે. મંત્રી બાંગરપ્પાએ જ્યારે જેડીએસની પદયાત્રા વિશે પૂછ્યું ત્યારે વિજયેન્દ્રએ બેદરકારીપૂર્વક જવાબ આપ્યો હતો કે, "આ પદયાત્રા એટલી મહત્વની નથી, કારણ કે આમાં જેડીએસનો વ્યક્તિગત સ્વાર્થ અને એજન્ડા છે. ખેડૂતો ખુશીથી સરકારનું વળતર લઈ રહ્યા છે અને ભાજપને આ પદયાત્રા સાથે કોઈ લેવાદેવા નથી." જોકે, કાર્યક્રમ દરમિયાન લાઈવ બ્રોડકાસ્ટરનું માઈક ચાલુ રહી જતાં આ આખી ગુપ્ત વાતચીત રેકોર્ડ થઈ ગઈ હતી અને સોશિયલ મીડિયા પર વાયરલ થઈ ગઈ હતી.

ઉલ્લેખનીય છે કે કેન્દ્રીય મંત્રી એચ.ડી. કુમારસ્વામીના ભાજપના કેન્દ્રીય નેતા નરેન્દ્ર મોદી અને અમિત શાહ સાથે અત્યંત સારા સંબંધો છે, પરંતુ કર્ણાટક ભાજપના સ્થાનિક નેતાઓ સાથે તેમનો તાલમેલ પહેલેથી જ નબળો રહ્યો છે. બિદાદીનો મુદ્દો ગરમાયા બાદ કુમારસ્વામીએ હાઈકમાન્ડને ફરિયાદ કરી હતી કે સ્થાનિક ભાજપ ગઠબંધન ધર્મ નિભાવતું નથી. ત્યારબાદ દિલ્હીના આદેશથી વિજયેન્દ્રએ કુમારસ્વામી સાથે મુલાકાત કરીને સંયુક્ત પદયાત્રાની ખાતરી આપી હતી. પરંતુ, ભાજપ સાથે આખરી સલાહ-મસલત કર્યા વિના જ જેડીએસના નેતા નિખિલ કુમારસ્વામીએ પદયાત્રાની તારીખો જાહેર કરી દેતાં વિવાદ વધુ વકર્યો હતો.

આ વિડીયો લીક થતાં વિજયેન્દ્ર ભારે શરમજનક સ્થિતિમાં મુકાયા છે, તો બીજી તરફ એચ.ડી. કુમારસ્વામીએ આ ઘટનાને અત્યંત ગંભીરતાથી લીધી છે. ગઠબંધન ભાગીદાર પ્રત્યે સ્થાનિક ભાજપ પ્રમુખના આવા વલણ સામે કુમારસ્વામી હવે દિલ્હી ખાતે ભાજપના કેન્દ્રીય નેતૃત્વ સમક્ષ સત્તાવાર વિરોધ નોંધાવવા અને કડક રજૂઆત કરવાની તૈયારી કરી રહ્યા છે.