નવી દિલ્હી: જવાહરલાલ નેહરુ યુનિવર્સિટી દેશદ્રોહ અને વિરોધના નવા વંટોળ સાથે ફરી એકવાર અશાંત બની હતી. જેલમાં બંધ ભૂતપૂર્વ વિદ્યાર્થી નેતા ઉમર ખાલિદના પુસ્તક "ફ્રેક્ચર્ડ કોમ્યુનિટીઝ" પર યોજાયેલી ચર્ચા દરમિયાન રાષ્ટ્રવિરોધી અને ઉશ્કેરણીજનક નારાબાજી થતાં સમગ્ર કેમ્પસ યુદ્ધના મેદાનમાં ફેરવાઈ ગયું હતું. JNU વિદ્યાર્થી સંઘ (JNUSU) ના કાર્યકરોએ "ઉમર ખાલિદને મુક્ત કરો" અને "જેલના તાળા તોડી નાખવામાં આવશે, બધા સાથીઓને મુક્ત કરવામાં આવશે" જેવા તીખા સૂત્રોચ્ચાર કરીને વાતાવરણમાં ગરમાવો લાવી દીદો હતો, જેની સામે જમણેરી સંગઠન ABVP ના વિદ્યાર્થીઓએ પણ સામે પહોંચી આકરા પ્રહારો કર્યા હતા.

આ સમગ્ર વિવાદની શરૂઆત ત્યારે થઈ જ્યારે JNU પ્રશાસને છેલ્લી ઘડીએ આ પુસ્તક ચર્ચા માટે કાર્યક્રમનું ઓડિટોરિયમ બુકિંગ અચાનક રદ કરી દીધું હતું. વહીવટીતંત્રના આ નિર્ણયને "સંઘી માનસિકતા" ગણાવીને JNUSU એ ઝુકવાને બદલે SSS-2 બિલ્ડિંગની બહાર ખુલ્લામાં જ સેંકડો વિદ્યાર્થીઓની હાજરીમાં આયોજન ચાલુ રાખ્યું હતું. કાર્યક્રમ શરૂ થતાં જ ABVP ના વિરોધકર્તાઓએ સ્થળ પર પહોંચી "ખાલિદ પાકિસ્તાની છે" ના નારા લગાવી કાર્યક્રમ અટકાવવાનો પ્રયાસ કર્યો હતો, જેના કારણે બંને જૂથો વચ્ચે ઉગ્ર ઘર્ષણ અને સામસામે વિરોધ પ્રદર્શન જોવા મળ્યા હતા.

આ ઘટના બાદ JNUSU એ સત્તાવાર નિવેદન જાહેર કરીને આરોપ લગાવ્યો હતો કે ABVP ના કાર્યકરોએ વક્તવ્ય આપી રહેલા પેનલિસ્ટો પાસેથી માઇક્રોફોન છીનવી લેવાનો પ્રયાસ કર્યો હતો અને હિંસક માહોલ ઊભો કર્યો હતો. વિદ્યાર્થી સંઘે સ્પષ્ટ કર્યું કે કેમ્પસમાં ચર્ચા, વિચારવિમર્શ અને અસંમતિના લોકશાહી અધિકારો પર પ્રહારો કરવામાં આવી રહ્યા છે, પરંતુ તેઓ તમામ રાજકીય કેદીઓના અવાજ બનવાનું ચાલુ રાખશે. હાલમાં સ્થિતિને ધ્યાનમાં રાખીને કેમ્પસમાં સુરક્ષા વધારી દેવામાં આવી છે અને સમગ્ર ઘટના અંગે પોલીસ તેમજ યુનિવર્સિટી વહીવટીતંત્રની પ્રતિક્રિયાની રાહ જોવાઈ રહી છે.