સોમવારે મોડી રાત્રે મહારાષ્ટ્ર ના પાલઘર જિલ્‍લામાં ૩.૪ ની તીવ્રતાના બે સળંગ હળવા ભૂકંપના આંચકા અનુભવાયા હતા, જેના કારણે સ્‍થાનિક રહીશોમાં થોડા સમય માટે ગભરાટ ફેલાઈ ગયો હતો. સત્તાવાર માહિતી અનુસાર, એક કલાકની અંદર જ આ બંને આંચકા આવ્‍યા હતા, પરંતુ સમગ્ર વિસ્‍તારમાં કોઈ જાનહાનિ કે મિલકતને નુકસાન થયાના અહેવાલ નથી.

જિલ્‍લા માહિતી કાર્યાલય દ્વારા જાહેર કરાયેલી માહિતી મુજબ, પાલઘરના જવાહર  તાલુકામાં સોમવારે રાત્રે ૧૦:૦૪ વાગ્‍યે ભૂકંપનો પહેલો આંચકો  અનુભવાયો હતો. ત્‍યારબાદ રાત્રે ૧૧:૦૦ વાગ્‍યે આટલી જ તીવ્રતાનો બીજો આંચકો આવ્‍યો હતો.

જિલ્‍લા આપત્તિ વ્‍યવસ્‍થાપન સેલ ના વડા વિવેકાનંદ કદમએ પુષ્ટિ કરી હતી કે, બંને આંચકાઓનું કેન્‍દ્રબિદુ જવાહર તાલુકામાં જમીનથી ૫ કિલોમીટરની ઓછી ઊંડાઈએ હતું. ભૂકંપનું કેન્‍દ્ર સપાટીથી નજીક હોવાના કારણે પહાડી વિસ્‍તારના અનેક ગામડાઓ અને શહેરોમાં કંપન સ્‍પષ્ટપણે અનુભવાયું હતું.

એક કલાકથી પણ ઓછા સમયમાં પાલઘરમાં ભૂકંપના બે આંચકા આવતાં સ્‍થાનિક લોકોમાં ભારે ફફડાટ વ્‍યાપી ગયો હતો. જવાહર અને આસપાસના વિસ્‍તારોના ઘણા રહીશો રાત્રિ દરમિયાન વધુ આંચકા આવવાની બીકે સાવચેતીના ભાગરૂપે ઘરોમાંથી બહાર ખુલ્‍લા મેદાનમાં દોડી આવ્‍યા હતા.

મોડી રાત્રે આવેલા આ આંચકાથી ડરનો માહોલ સર્જાયો હોવા છતાં, અસરગ્રસ્‍ત વિસ્‍તારોમાં વહીવટીતંત્ર દ્વારા કરવામાં આવેલા સર્વેક્ષણમાં પુષ્ટિ થઈ છે કે કોઈ જાનહાનિ થઈ નથી કે રહેણાંક મકાનો અથવા જાહેર સક્ષમતાઓને કોઈ નુકસાન પહોંચ્‍યું નથી.

આપત્તિ વ્‍યવસ્‍થાપન સત્તામંડળ સ્‍થિતિ પર નજર રાખી રહ્યું છે

કોઈ સ્‍થાનિક અસર થઈ છે કે નહીં તેનું મૂલ્‍યાંકન કરવા માટે આપત્તિ વ્‍યવસ્‍થાપન ટીમો અને સ્‍થાનિક વહીવટી સત્તાવાળાઓએ તાત્‍કાલિક ધોરણે જિલ્‍લાભરમાં મોનિટરિગ કામગીરી શરૂ કરી હતી. વાસ્‍તવિક પરિસ્‍થિતિ પર નજર રાખવા માટે જિલ્‍લા આપત્તિ વ્‍યવસ્‍થાપન સેલના અધિકારીઓ મહેસૂલ વિભાગના અધિકારીઓ અને ગ્રામ પંચાયતોના સતત સંપર્કમાં રહ્યા હતા.

વિવેકાનંદ કદમે જનતાને ખાતરી આપી હતી કે કટોકટી પ્રતિભાવ પ્રણાલીને એલર્ટ પર રાખવામાં આવી છે અને નાગરિકોને શાંતિ જાળવી રાખી ભૂકંપ સુરક્ષા માર્ગદર્શિકાનું પાલન કરવા વિનંતી કરી હતી.

મુંબઈથી ઉત્તરે લગભગ ૧૦૦ કિલોમીટર દૂર આવેલો પાલઘર જિલ્‍લો હળવા ભૂકંપના આંચકાઓનો ઇતિહાસ ધરાવે છે. ભૂસ્‍તરશાષીય નિષ્‍ણાતો નોંધે છે કે જિલ્‍લાના કેટલાક ભાગો, ખાસ કરીને જવાહર, ડાહાણુ અને તલાસરી તાલુકાઓ ભૂકંપ સંબંધિત સક્રિય ઝોન હેઠળ આવે છે, જ્‍યાં સમયાંતરે હળવા આંચકાઓ નોંધાતા રહે છે.

ગયા મહિને પણ આ વિસ્‍તારમાં ત્રણ હળવા આંચકા નોંધાયા હતા અને આ બંને આંચકા પણ એ જ પેટર્ન દર્શાવે છે. સ્‍થાનિક સત્તાવાળાઓ સંવેદનશીલ વિસ્‍તારો પર સતત નજર રાખી રહ્યા છે અને નાગરિકોને આશ્વાસન આપી રહ્યા છે કે વર્તમાન ભૂકંપની સ્‍થિતિ સંપૂર્ણપણે નિયંત્રણ હેઠળ છે