નવી દિલ્હી :  કેન્દ્ર સરકારે દેશમાં ઈલેક્ટ્રિક વાહનો (EV) ને પ્રોત્સાહન આપવા અને ચાર્જિંગ ઈન્ફ્રાસ્ટ્રક્ચર મજબૂત કરવા માટે મહત્ત્વની જાહેરાત કરતા પીએમ ઈ-ડ્રાઈવ (PM E-DRIVE) યોજનાની સમયમર્યાદા ૩૧ માર્ચ, ૨૦૨૮ સુધી લંબાવી દીધી છે. ભારે ઉદ્યોગ મંત્રાલય દ્વારા જારી કરાયેલા નોટિફિકેશન મુજબ, આ સમગ્ર યોજના માટે ₹૧૧,૯૦૦ કરોડનું કુલ બજેટ ફાળવવામાં આવ્યું છે. આ યોજના લંબાવાતાં ઈલેક્ટ્રિક વાહન ખરીદવાનું વિચારતા ગ્રાહકોને રાહત મળી છે, પરંતુ તેની સાથે જ ઈ-ટુ-વ્હીલર પર મળતી સબસિડીના દરોમાં મોટો ઘટાડો કરવામાં આવ્યો છે.

નવા નિયમો અનુસાર, ઈલેક્ટ્રિક ટુ-વ્હીલર્સ પર અગાઉ મળતું ₹૫,૦૦૦ પ્રતિ kWh નું પ્રોત્સાહન ઘટાડીને હવે ₹૨,૫૦૦ પ્રતિ kWh કરી દેવામાં આવ્યું છે. આ ફેરફારને કારણે વાહન દીઠ મળતી મહત્તમ સબસિડીની મર્યાદા ₹૧૦,૦૦૦ થી ઘટીને હવે ₹૫,૦૦૦ થઈ ગઈ છે. એટલે કે, નવી સિસ્ટમ હેઠળ ગ્રાહકોને હવે પહેલા કરતાં અડધો જ લાભ મળશે. આ પ્રોત્સાહન માત્ર એવા જ ઈલેક્ટ્રિક ટુ-વ્હીલર્સને મળશે જેની મહત્તમ એક્સ-ફેક્ટરી કિંમત ₹૧.૫ લાખ સુધીની હશે, અને સબસિડીની રકમ વાહનની કિંમતના ૧૫ ટકાથી વધુ હોવી જોઈએ નહીં.

સરકારે સ્પષ્ટ કર્યું છે કે પીએમ ઈ-ડ્રાઈવ યોજના હેઠળ કોઈપણ ઘટક માટે દાવા સબમિટ કરવાની અંતિમ તારીખ ૩૧ ડિસેમ્બર, ૨૦૨૭ રહેશે, જ્યારે યોજનાની આખરી મુદત ૩૧ માર્ચ, ૨૦૨૮ સુધી લંબાવાઈ છે. આ યોજના મર્યાદિત ભંડોળ પર આધારિત હોવાથી જો નક્કી કરાયેલું બજેટ સમયસર પૂરું થઈ જશે તો યોજના અકાળે પણ બંધ થઈ શકે છે. ગ્રીન મોબિલિટીને પ્રોત્સાહન આપવા માટે હાથ ધરાયેલા આ નિર્ણયથી ઓટોમોબાઈલ ઈન્ડસ્ટ્રી અને ગ્રાહકો બંને માટે ઈ-વહિકલ ખરીદીનું ગણિત બદલાશે.