લખનૌ: ઉત્તર પ્રદેશ સરકારે ગ્રામીણ વિસ્તારોની આર્થિક સ્થિતિ સુધારવા અને પ્રાકૃતિક તથા ઓર્ગેનિક ખેતીને પ્રોત્સાહન આપવાના હેતુથી એક અનોખી પહેલ હાથ ધરી છે. રાજ્ય સરકાર દ્વારા પાયલોટ પ્રોજેક્ટ હેઠળ પશુપાલકો અને ખેડૂતો પાસેથી ₹૧૦ પ્રતિ લિટરના દરે દેશી ગાયનું ગૌમૂત્ર ખરીદવાની વ્યવસ્થા કરવામાં આવી રહી છે. આ યોજનાથી પશુપાલકો માટે કમાણીનો વધારાનો સ્ત્રોત ઊભો થશે અને ગૌવંશના જતન-સંવર્ધનને મોટો ટેકો મળશે.

આયુર્વેદિક દવાઓ અને ઓર્ગેનિક ખેતીમાં ઉપયોગિતા

આયુર્વેદ નિષ્ણાતોના જણાવ્યા અનુસાર, ઘણી પરંપરાગત ઔષધિઓ, પાઈલ્સ અને ત્વચાના રોગોની દવાઓ બનાવવામાં ગૌમૂત્રનો ઉપયોગ થાય છે. ફાર્માસ્યુટિકલ ક્ષેત્રે લાંબા સમયથી શુદ્ધ ગૌમૂત્રની માંગ વધી રહી હતી. તે સિવાય ઓર્ગેનિક ખેતીમાં કીટનાશક અને કુદરતી ખાતર બનાવવા માટે પણ તેનો વ્યાપક ઉપયોગ થશે. સામાન્ય રીતે એક સ્વસ્થ દેશી ગાય દરરોજ સરેરાશ ૫ લિટર સુધી ગૌમૂત્ર આપે છે, જેથી પશુપાલકોને રોજના ₹૫૦ સુધીની વધારાની આવક થઈ શકે છે.

ગ્રામીણ આવક વધશે અને પશુપાલનને મળશે પ્રોત્સાહન

સરકારની આ ખરીદ નીતિ જો સફળ રહેશે તો આગામી સમયમાં સમગ્ર રાજ્યમાં તેનો વિસ્તાર કરવામાં આવશે. આ પગલાથી માત્ર ખેડૂતોની જમીનની ફળદ્રુપતા વધશે એટલું જ નહીં પરંતુ રખડતા ઢોરની સમસ્યા દૂર કરવામાં પણ મદદ મળશે. જોકે, તબીબી નિષ્ણાતોએ સ્પષ્ટ કર્યું છે કે કોઈપણ રોગના ઈલાજ માટે તબીબી સલાહ વિના તેનો સીધો ઉપયોગ કરવાને બદલે યોગ્ય પ્રક્રિયામાંથી બનેલી આયુર્વેદિક દવાઓનો જ ઉપયોગ કરવો હિતાવહ છે.