નવી દિલ્‍હીઃ નીટ સ્‍નાતક૨૦૨૬ પેપર લીક કેસમાં આજે દિલ્‍હીની રાઉઝ એવન્‍યુ કોર્ટમાં મહત્‍વપૂર્ણ આદેશ આવવાની શક્‍યતા છે. કેન્‍દ્રીય તપાસ બ્‍યુરોએ દાખલ કરેલી ચાર્જશીટ ઉપર સંજ્ઞાન લેવું કે નહીં તે અંગેનો આદેશ વિશેષ ન્‍યાયાધીશ અજય ગુપ્તા આજે જાહેર કરવાના છે. અગાઉ અદાલતે જણાવ્‍યું હતું કે રેકોર્ડ અત્‍યંત વિશાળ હોવાથી આદેશ લખવાનું કાર્ય પૂર્ણ થઈ શક્‍યું નહોતું અને તેથી નિર્ણય ૧૨ ઓગસ્‍ટ સુધી મુલતવી રાખવામાં આવ્‍યો હતો.

કેન્‍દ્રીય તપાસ બ્‍યુરોએ ૧૩ આરોપીઓ સામે લગભગ ૨૦ હજાર પાનાની ચાર્જશીટ દાખલ કરી છે. તપાસ એજન્‍સીએ તેમાં ૩૬૦ સાક્ષીઓના નિવેદન, ૪૨૨ દસ્‍તાવેજો અને ૪૩ ભૌતિક પુરાવાઓનો આધાર લીધો હોવાનું અદાલતી કાર્યવાહીમાં સામે આવ્‍યું છે. આરોપોમાં ગુનાહિત ષડયંત્ર, છેતરપિડી, વિશ્વાસઘાત અને પુરાવા નષ્ટ કરવા સહિતની જોગવાઈઓ સામેલ છે. અગાઉ ત્રણ આરોપીઓએ પોલીગ્રાફ, બ્રેઇન મેપિગ અને લાઇ ડિટેક્‍ટર પરીક્ષણની માંગ કરી હતી, પરંતુ અદાલતે તે અરજી ફગાવી દીધી હતી. હવે ચાર્જશીટ ઉપર સંજ્ઞાન અંગે આજના આદેશ ઉપર સૌની નજર છે