મુંબઈ: તા.12 બેંકિંગ ક્ષેત્રે સરકારી નોકરી મેળવવા માંગતા યુવાનો માટે એક ખુશખબર આવી છે. સ્ટેટ બેંક ઓફ ઈન્ડિયા (SBI) એ ક્લાર્ક કેડરમાં જુનિયર એસોસિએટ (કસ્ટમર સપોર્ટ એન્ડ સેલ્સ) ની કુલ 6,944 ખાલી જગ્યાઓ ભરવા માટે મોટી ભરતીની જાહેરાત કરી છે. લાયક અને ઇચ્છુક ઉમેદવારો બેંકના સત્તાવાર પોર્ટલ sbi.bank.in પર જઈને ઓનલાઈન અરજી કરી શકે છે. નોંધણી પ્રક્રિયા 11 ઓગસ્ટથી શરૂ થઈ ચૂકી છે અને અરજી કરવાની છેલ્લી તારીખ 31 ઓગસ્ટ, 2026 નક્કી કરવામાં આવી છે.

આ ભરતી પ્રક્રિયા હેઠળ વિવિધ રાજ્યો અને કેન્દ્રશાસિત પ્રદેશો માટે જગ્યાઓ ફાળવવામાં આવી છે, જેમાં મહારાષ્ટ્ર/મુંબઈ મેટ્રોમાં સૌથી વધુ 1,718 અને ગુજરાતમાં 330 જગ્યાઓનો સમાવેશ થાય છે. ઉમેદવારો ખાસ નોંધ લે કે તેઓ માત્ર એક જ રાજ્ય અથવા કેન્દ્રશાસિત પ્રદેશ માટે અરજી કરી શકશે. અરજી કરવા માટે ઉમેદવાર પાસે માન્ય યુનિવર્સિટીમાંથી કોઈપણ વિદ્યાશાખામાં સ્નાતક (ગ્રેજ્યુએશન) ની ડિગ્રી હોવી જરૂરી છે. વય મર્યાદા 20 થી 28 વર્ષ નક્કી કરવામાં આવી છે, જ્યારે અનામત વર્ગના ઉમેદવારોને નિયમાનુસાર વયમર્યાદામાં છૂટછાટ મળશે.

અરજી ફી તરીકે જનરલ, OBC અને EWS વર્ગ માટે ₹750 નક્કી કરાયા છે, જ્યારે SC, ST અને PwBD ઉમેદવારો માટે કોઈ ફી નથી. ઉમેદવારોની પસંદગી ત્રણ તબક્કામાં થશે, જેમાં પ્રારંભિક પરીક્ષા (સપ્ટેમ્બર 2026), મુખ્ય પરીક્ષા (નવેમ્બર 2026) અને સ્થાનિક ભાષા પ્રાવીણ્ય કસોટીનો સમાવેશ થાય છે. પસંદગી પામેલા ઉમેદવારોને મુંબઈ જેવા મેટ્રો શહેરોમાં તમામ ભથ્થાઓ સાથે પ્રતિ માસ આશરે ₹46,000 નો પ્રારંભિક પગાર મળશે, જે બેંકિંગ ક્ષેત્રે નવી શરૂઆત કરનાર યુવાનો માટે એક ઉત્કૃષ્ટ તક છે.