મુંબઈ : શેરબજારમાં પોતાના રોકાણકારોને સતત મલ્ટીબેગર વળતર આપનારી કંપની PH કેપિટલ લિમિટેડે એક મોટો અને ઐતિહાસિક નિર્ણય લીધો છે. કંપનીના બોર્ડ ઓફ ડિરેક્ટર્સે તેના શેરધારકોને ૧:૧૦ ના ગુણોત્તરમાં બોનસ શેર આપવાની સત્તાવાર જાહેરાત કરી છે. આ નિર્ણય હેઠળ, ₹૧૦ ની ફેસ વેલ્યુ ધરાવતો ૧ શેર ધરાવનાર રોકાણકારને ૧૦ ફ્રી બોનસ શેર આપવામાં આવશે. કંપનીના ઈતિહાસમાં આ પહેલીવાર છે જ્યારે તે પોતાના રોકાણકારોને બોનસ શેરની ભેટ આપી રહી છે.

આ ધમાકેદાર જાહેરાત બાદ બુધવારે BSE પર કંપનીના શેરમાં જોરદાર તેજી જોવા મળી હતી. ટ્રેડિંગ દરમિયાન કંપનીનો શેર ₹૧૦૫૦.૮૫ ના ઇન્ટ્રાડે ઓલ-ટાઇમ હાઇ સ્તરે પહોંચી ગયો હતો. જોકે, દિવસના અંતે શેર ₹૧૦૧૦ ના સ્તરે બંધ થયો હતો. નોંધનીય છે કે આ સ્ટોકનો ૫૨ અઠવાડિયાનો નીચો સ્તર ₹૧૬૫.૦૫ હતો, જે દર્શાવે છે કે આ એક વર્ષના ટૂંકા ગાળામાં જ શેરે ૪૦૭% જેટલું જંગી વળતર આપ્યું છે.

કંપનીના ગત ટ્રેક રેકોર્ડ પર નજર કરીએ તો, આ સ્ટોકે રોકાણકારો માટે સંપત્તિનું સર્જન કર્યું છે. છેલ્લા ૩ વર્ષમાં ૧૧૪૯% અને ૧૦ વર્ષના લાંબા ગાળે આ શેરે ૪૯૫૦% નું અધધ વળતર આપ્યું છે. જૂન ક્વાર્ટરના શેરહોલ્ડિંગ પેટર્ન મુજબ, કંપનીમાં પ્રમોટરો ૨૭.૩૦% હિસ્સો ધરાવે છે જ્યારે આમ જનતા પાસે ૭૨.૭૦% નો હિસ્સો છે. બોનસ શેર મેળવવા માટેની રેકોર્ડ તારીખ કંપની દ્વારા ટૂંક સમયમાં જાહેર કરવામાં આવશે.