લંડન : યુનાઇટેડ કિંગડમમાં મ્યાનમારના ભૂતપૂર્વ રાજદૂત ક્યાવ ઝ્વર મિન પર લંડનની કોર્ટમાં કેસ ચલાવવામાં આવી રહ્યો છે. તેમના પર લંડન સ્થિત મ્યાનમારના સત્તાવાર રાજદ્વારી નિવાસસ્થાન 'મ્યાનમાર હાઉસ' માં ગેરકાયદેસર રીતે અતિક્રમણ કરવાનો અને કબ્જો જમાવી રાખવાનો આરોપ મૂકવામાં આવ્યો છે. ૬૮ વર્ષીય મિને વર્ષ ૨૦૨૧ માં મ્યાનમારમાં થયેલા લશ્કરી તખ્તાપલટનો વિરોધ કર્યો હતો અને નાગરિક નેતા આંગ સાન સુ કીની મુક્તિ માટે જાહેર અપીલ કરી હતી.

તખ્તાપલટ બાદ મ્યાનમારના લશ્કરી શાસકોએ ક્યાવ ઝ્વર મિનને રાજદૂત પદેથી હટાવી દીધા હતા અને દૂતાવાસ તથા નિવાસસ્થાન સોંપવાનો આદેશ આપ્યો હતો. આમ છતાં, તેમણે મે ૨૦૨૧ થી નવેમ્બર ૨૦૨૪ દરમિયાન ઉત્તરપશ્ચિમ લંડનમાં આવેલા મ્યાનમાર હાઉસ ખાલી કરવાનો ઇનકાર કર્યો હતો. વેસ્ટમિન્સ્ટર મેજિસ્ટ્રેટ કોર્ટ સમક્ષ પ્રોસિક્યુશને દલીલ કરી હતી કે રાજદૂત તરીકેનો હોદ્દો સમાપ્ત થતાં જ મિલકતમાં રહેવાની તેમની કાયદેસરની પરવાનગી પણ સમાપ્ત થઈ ગઈ હતી, જેથી તેઓ અતિક્રમણના દોષિત ઠરે છે.

બીજી તરફ, મિને દોષિત ન હોવાની કબૂલાત કરી છે. તેમના વકીલ ડેવિડ પેરીએ કાનૂની બચાવમાં દલીલ કરી છે કે મ્યાનમારમાં સત્તા હડપ કરનાર લશ્કરી શાસન પોતે જ ગેરકાયદેસર છે, જેથી તેમની પાસે રાજદ્વારી મિલકતનો ઉપયોગ કરવાનો કે પરવાનગી રદ કરવાનો કોઈ કાયદેસર અધિકાર નથી. હાલ આ હાઇ-પ્રોફાઇલ ડિપ્લોમેટિક કેસમાં ટ્રાયલ ચાલી રહી છે.