કોલકાતા :  પશ્ચિમ બંગાળના રાજકારણમાં એક નવો મોટો વિવાદ છેડાઈ ગયો છે. ભાજપના રાજ્યસભા સાંસદ અનંત મહારાજ (જેઓ નાગેન્દ્ર રોય તરીકે પણ ઓળખાય છે) દ્વારા મહાન સ્વાતંત્ર્ય સેનાની નેતાજી સુભાષચંદ્ર બોઝ અને આઝાદ હિંદ ફોજ પર કરવામાં આવેલી વિવાદાસ્પદ અને વાંધાજનક ટિપ્પણી બાદ ભારે આક્રોશ વ્યાપી ગયો છે. આ મામલાને અત્યંત ગંભીરતાથી લેતા પશ્ચિમ બંગાળ સરકારે કડક વલણ અપનાવ્યું છે અને અનંત મહારાજને એનાયત કરવામાં આવેલો રાજ્યનો સર્વોચ્ચ નાગરિક પુરસ્કાર 'બંગ વિભૂષણ' તાત્કાલિક અસરથી પાછો ખેંચીને રદ કરવાનો નિર્ણય લીધો છે.

આ ભારે બબાલની શરૂઆત ત્યારે થઈ જ્યારે અનંત મહારાજે દેશના સ્વાતંત્ર્ય સંગ્રામના ઇતિહાસ અને નેતાજીના અવિશ્વસનીય યોગદાન પર સવાલો ખડા કર્યા હતા. તેમણે આઝાદ હિંદ ફોજની પ્રાસંગિકતાને ફગાવતા વિવાદાસ્પદ દાવો કર્યો હતો કે આઝાદ હિંદ ફોજના સૈનિકો મૂળભૂત રીતે બ્રિટિશ સેનાના જવાનો હતા, જેમને જર્મનીએ પકડીને નેતાજીને સોંપ્યા હતા અને નેતાજીએ તેનો દુરુપયોગ કર્યો હતો. આટલું જ નહીં, તેમણે બ્રિટિશ શાસનની પ્રશંસા કરતા આઝાદ હિંદ ફોજ દ્વારા અંગ્રેજો સામે હથિયાર ઉપાડવાના નિર્ણય સામે પણ અયોગ્ય તર્ક રજૂ કર્યા હતા. આ નિવેદન વાયરલ થતાં જ સમગ્ર બંગાળ સહિત દેશભરમાં નેતાજીના ચાહકો અને દેશપ્રેમીઓમાં આક્રોશનું મોજું ફરી વળ્યું હતું.

નેતાજી સુભાષચંદ્ર બોઝ પ્રત્યેનું આ પ્રકારનું અપમાન બિલકુલ સહન કરવામાં નહીં આવે તેવો સ્પષ્ટ અને મજબૂત સંદેશ આપવા માટે સરકારે આ કાર્યવાહી કરી છે. આ મામલે સ્પષ્ટ ચેતવણી આપવામાં આવી છે કે દેશ અને રાજ્યના દરેક નાગરિક માટે કાયદો સમાન છે, અને ભલે ગમે તેટલી પહોંચ ધરાવતી વ્યક્તિ હોય, જો દેશના મહાન સ્વાતંત્ર્ય સેનાનીઓનું અપમાન કરશે તો તેને બક્ષવામાં નહીં આવે. બંગ વિભૂષણ પુરસ્કાર પાછો ખેંચવાના આ નિર્ણયથી રાજકીય ક્ષેત્રે ગરમાવો આવી ગયો છે અને સમગ્ર રાજ્યમાં આ ગંભીર મુદ્દો ભારે ચર્ચાનો વિષય બન્યો છે.