નવી દિલ્હી :  વર્ષ ૨૦૨૬નું સંસદનું ચોમાસુ સત્ર ભારે હોબાળા, રાજકીય ઘર્ષણ અને તીખા આક્ષેપો વચ્ચે ગુરુવારે અનિશ્ચિત મુદત માટે સ્થગિત થઈ ગયું છે. સત્રના સમાપન બાદ તુરંત જ કોંગ્રેસે દિલ્હી ખાતે પત્રકાર પરિષદ યોજીને વિપક્ષી એકતાનો મોટો વિજયદાવો કર્યો હતો. કોંગ્રેસના મહાસચિવ જયરામ રમેશે જણાવ્યું હતું કે આખા સત્ર દરમિયાન મોદી સરકાર વિપક્ષના ભારે દબાણ હેઠળ રહી હતી અને વિપક્ષી દળોએ એકજૂથ થઈને સરકારના પાંચ અતિ મહત્વના બિલ અને પ્રસ્તાવોને પસાર થતાં સફળતાપૂર્વક રોકી દીધા છે.

કોંગ્રેસે પોતાની સિદ્ધિઓ ગણાવતાં દાવો કર્યો હતો કે વિપક્ષના આક્રમક વિરોધને કારણે સરકાર 'એક રાષ્ટ્ર, એક ચૂંટણી' બિલ, વિકસિત ભારત શિક્ષા પ્રતિષ્ઠાન બિલ, ગેરકાયદે ધરપકડ બાદ ચૂંટાયેલા પ્રતિનિધિઓને પદ પરથી હટાવવા અંગેનું બંધારણીય સુધારા બિલ, એફસીઆરએ (FCRA) બિલ અને સીમાંકન સંબંધિત બંધારણીય સુધારા પ્રસ્તાવને આગળ વધારી શકી નથી. આ ઉપરાંત, કોંગ્રેસે વડાપ્રધાન નરેન્દ્ર મોદી અને ગૃહમંત્રી અમિત શાહની સંસદમાં ગેરહાજરી પર પણ સવાલો ઉઠાવ્યા હતા અને આરોપ લગાવ્યો હતો કે બંને ટોચના નેતાઓ મોટાભાગના સમયગાળા દરમિયાન સંસદથી દૂર રહ્યા હતા.

બીજી તરફ, ભારતીય જનતા પાર્ટીએ કોંગ્રેસના તમામ દાવાઓને સખત શબ્દોમાં નકારી કાઢ્યા હતા. ભાજપના વરિષ્ઠ નેતા અને સાંસદ રવિશંકર પ્રસાદે પ્રેસ કોન્ફરન્સ કરીને રાહુલ ગાંધી અને વિપક્ષ પર ગૃહની કાર્યવાહીમાં સતત ખલેલ પહોંચાડવાનો આક્ષેપ કર્યો હતો. તેમણે જણાવ્યું હતું કે આખું ચોમાસુ સત્ર વિરોધ પક્ષના નેતાના અહંકાર અને અશિસ્તની બલિ ચડી ગયું છે. ભાજપે સ્પષ્ટ કર્યું કે વિપક્ષ માત્ર રાજકીય સ્ટંટ કરી રહ્યો છે અને દેશના વિકાસ સંબંધિત મહત્વપૂર્ણ કાયદાકીય કામગીરીને અટકાવવા માટે જવાબદાર છે.