નવી દિલ્હી: તા.14: રાષ્ટ્રીય રાજધાની દિલ્હીના મયુર વિહાર ફેઝ-3 વિસ્તારમાં શુક્રવારે સવારે એક હૃદયદ્રાવક અકસ્માત સર્જાયો હતો. પિતા સાથે સ્ટીલ જેવા મનોરથો અને સપનાઓ લઈને શાળાએ ભણવા જઈ રહેલી માત્ર 12 વર્ષની નિરાધાર બાળકીને દિલ્હી ટ્રાન્સપોર્ટ કોર્પોરેશન (DTC) ની પૂરપાટ ઝડપે આવતી બસે કચડી નાખતા તેનું કરૂણ મોત નીપજ્યું હતું. આ ગોઝારી ઘટના દલ્લુપુરા વિસ્તાર પાસે સવારે આશરે 8:30 વાગ્યે બની હતી, જેનાથી સમગ્ર વિસ્તારમાં શોકનું મોજું ફરી વળ્યું છે.

મૃતક બાળકીની ઓળખ કૈના તરીકે થઈ છે, જે ખીચડીપુર વિસ્તારમાં તેના પરિવાર સાથે રહેતી હતી અને વસુંધરા એન્ક્લેવ સ્થિત ઈસ્ટ પોઈન્ટ સ્કૂલમાં અભ્યાસ કરતી હતી. શુક્રવારની સવારે જ્યારે કૈના તેના પિતાના સ્કૂટર પર પાછળ બેસીને સ્કૂલે જઈ રહી હતી, ત્યારે પાછળથી પૂરપાટ ઝડપે આવી રહેલી એક બેફામ ડીટીસી બસે તેમના સ્કૂટરને જોરદાર ટક્કર મારી હતી. આ અચાનક થયેલા અકસ્માતને કારણે સ્કૂટર રસ્તા પર પછડાયું હતું અને કૈના સીધી બસના પૈડા નીચે આવી ગઈ હતી. ગંભીર ઈજાઓને કારણે માસૂમ બાળકીએ ઘટનાસ્થળે જ દમ તોડી દીધો હતો.

આ કરૂણ અકસ્માતને પગલે ઘટનાસ્થળે એકઠા થયેલા સ્થાનિક લોકો અને રાહદારીઓમાં ભારે આક્રોશ ફાટી નીકળ્યો હતો. ગુસ્સે ભરાયેલા ટોળાંએ અકસ્માત સર્જનાર ડીટીસી બસમાં તોડફોડ શરૂ કરી દીધી હતી. ઘટનાની ગંભીરતા જોઈને સ્થાનિક પોલીસ કાફલો તાબડતોબ સ્થળ પર ધસી ગયો હતો અને ભારે મથામણ બાદ સ્થિતિ પર કાબૂ મેળવ્યો હતો. ડીસીપી રાજીવ કુમારના જણાવ્યા અનુસાર, બાળકીના મૃતદેહને કબ્જે લઈને પોસ્ટમોર્ટમ માટે લાલ બહાદુર શાસ્ત્રી હોસ્પિટલના શબઘરમાં મોકલી આપવામાં આવ્યો છે.

દરમિયાન, પોલીસે ગુનો નોંધી અકસ્માત સર્જનાર ડીટીસી બસના ડ્રાઈવરને અટકાયતમાં લઈ લીધો છે. પોલીસે સમગ્ર વિસ્તારના સીસીટીવી (CCTV) ફૂટેજ કબ્જે કરીને આગળની કાનૂની તપાસ હાથ ધરી છે, જેથી અકસ્માત કયા સંજોગોમાં સર્જાયો હતો તેની ચોક્કસ માહિતી મેળવી શકાય. એક નાનકડી બાળકીના અકાળે અવસાનથી તેના પરિવાર પર દૂખનો પહાડ તૂટી પડ્યો છે.