નવી દિલ્હી: તા.14: પશ્ચિમ એશિયામાં અમેરિકા સાથે વધતા જતા ભયાનક લશ્કરી તણાવ અને યુદ્ધ જેવા માહોલ વચ્ચે વૈશ્વિક રાજકારણથી મોટા સમાચાર સામે આવ્યા છે. ઈરાનના રાષ્ટ્રપતિ મસૂદ પેઝેશ્કિયાન આગામી સપ્ટેમ્બર મહિનામાં ભારતની મુલાકાતે આવી રહ્યા છે. શુક્રવારે ઈરાની વર્તુળો દ્વારા કરવામાં આવેલી જાહેરાત મુજબ, રાષ્ટ્રપતિ પેઝેશ્કિયાન નવી દિલ્હીમાં યોજાનારી 18મી બ્રિક્સ (BRICS) સમિટમાં ભાગ લેવા માટે ભારત પધારશે. આ ઐતિહાસિક મુલાકાતને વૈશ્વિક રાજદ્વારી સ્તરે અત્યંત મહત્વપૂર્ણ ગણવામાં આવી રહી છે.

ભારત વર્ષ 2026માં બ્રિક્સ જૂથની અધ્યક્ષતા કરી રહ્યું છે અને 12-13 સપ્ટેમ્બર દરમિયાન નવી દિલ્હી ખાતે 18મી બ્રિક્સ શિખર પરિષદનું આયોજન કરવામાં આવ્યું છે. "સ્થિતિસ્થાપકતા, નવીનતા, સહકાર અને ટકાઉપણું માટે નિર્માણ" થીમ પર યોજાનારી આ સમિટમાં ઈરાનના રાષ્ટ્રપતિ પોતાના દેશનું પ્રતિનિધિત્વ કરશે. નોંધનીય છે કે ઈરાન 2024માં ઈજિપ્ત, ઈથોપિયા અને યુએઈ સાથે બ્રિક્સનું પૂર્ણ સભ્ય બન્યું હતું, જ્યારે 2025માં ઈન્ડોનેશિયા જોડાયા બાદ હવે આ જૂથના સભ્યોની સંખ્યા 11 થઈ ગઈ છે.

આ મુલાકાત એવા સમયે થઈ રહી છે જ્યારે મધ્ય પૂર્વમાં ભારે અસ્થિરતા પ્રવર્તી રહી છે. ઈરાનનો સ્પષ્ટ સંદેશ છે કે તે ક્ષેત્રમાં વધતા સંઘર્ષને ઘટાડવા માટે ભારત જેવા તટસ્થ અને મજબૂત દેશની મધ્યસ્થતાનું સ્વાગત કરે છે. આ અગાઉ ઈરાનના વિદેશ પ્રધાન અબ્બાસ અરાઘચીએ નવી દિલ્હીની મુલાકાત દરમિયાન સ્પષ્ટ કર્યું હતું કે ઈરાન કોઈપણ યુદ્ધના પક્ષમાં નથી અને ભારત આ તણાવ ઓછો કરવામાં "મોટી અને નિર્ણાયક ભૂમિકા" ભજવી શકે છે.

નવી દિલ્હીમાં યોજાનારી આ પરિષદ દરમિયાન રાષ્ટ્રપતિ મસૂદ પેઝેશ્કિયાન અને ભારતના વડાપ્રધાન નરેન્દ્ર મોદી વચ્ચે દ્વિપક્ષીય બેઠક પણ યોજાશે. આ બેઠકમાં હોર્મુઝ સ્ટ્રેટમાં વેપારી જહાજોની સુરક્ષા, ચાબહાર બંદરના વિકાસ અને ભારત-ઈરાન વચ્ચેના દ્વિપક્ષીય સંબંધોને વધુ મજબૂત કરવા પર ગંભીર ચર્ચા થવાની પૂર્ણ શક્યતા છે.