ચંદીગઢ: શીખ કેદીઓ (બંદી સિંહો) ની મુક્તિ માટે લાંબા સમયથી ચાલી રહેલું આંદોલન શનિવારે અચાનક હિંસક અને અસ્થિર બની ગયું હતું. 'કૌમી ઇન્સાફ મોરચા' દ્વારા પંજાબના રાજ્યપાલ ગુલાબ ચંદ કટારિયાના નિવાસસ્થાન (લોકભવન) તરફ કૂચ યોજવામાં આવી હતી. પ્રદર્શનકારીઓએ ટ્રેક્ટરો અને ભારે સાધનો વડે પોલીસ બેરિકેડ્સ અને કાંટાળા તાર તોડીને આગળ વધવાનો પ્રયાસ કરતાં પોલીસે આક્રમક વલણ અપનાવ્યું હતું. પરિસ્થિતિ પર કાબૂ મેળવવા પોલીસે અનેક રાઉન્ડ ટીયર ગેસના શેલ છોડ્યા હતા અને વોટર કેનનનો ઉપયોગ કરી ભીડને વિખેરી નાખી હતી.

રાજ્યપાલ ભવન તરફ આગળ વધી રહેલા શિરોમણી અકાલી દળ (અમૃતસર)ના પ્રમુખ સિમરનજીત સિંહ માન સહિત અનેક અગ્રણી નેતાઓની પોલીસે સ્થળ પરથી જ અટકાયતમાં લીધી હતી. આ મુકાબલા બાદ આંદોલનને વધુ તીવ્ર બનાવતા મોરચાએ ૨૧ ઓગસ્ટે સમગ્ર પંજાબ બંધનું એલાન આપ્યું છે. સુરક્ષા વ્યવસ્થાને ધ્યાનમાં રાખીને ચંદીગઢ અને મોહાલી વચ્ચેની તમામ સરહદો સંપૂર્ણપણે સીલ કરી દેવામાં આવી હતી અને પરિસ્થિતિ પર નજર રાખવા માટે પ્રથમ વખત ડ્રોન ટેકનોલોજીનો ઉપયોગ કરવામાં આવ્યો હતો.

૧૯૯૫માં પંજાબના તત્કાલીન મુખ્યમંત્રી બિઅંત સિંહની હત્યા કેસમાં સજા ભોગવી રહેલા જગતાર સિંહ હવારા, બળવંત સિંહ રાજોઆના અને ૧૯૯૩ના બોમ્બ વિસ્ફોટના દોષી દેવિન્દરપાલ સિંહ ભુલ્લર સહિતની મુક્તિની માંગ સાથે કૌમી ઇન્સાફ મોરચા ૭ જાન્યુઆરી, ૨૦૨૩થી સતત વિરોધ પ્રદર્શન કરી રહ્યો છે. મોરચાનો દાવો છે કે પોતાની જેલની સજા પૂર્ણ કરી ચૂકેલા શીખ કેદીઓને તાત્કાલિક મુક્ત કરવા જોઈએ, જેને લઈને હવે સમગ્ર પંજાબમાં રાજકીય અને સામાજિક ગરમાવો આવી ગયો છે.