નવી દિલ્હી: તા.૧૫ ભારતની સૌપ્રથમ મુંબઈ-અમદાવાદ હાઇ-સ્પીડ બુલેટ ટ્રેનને લઈને દેશભરમાં ભારે ઉત્સુકતા જોવા મળી રહી છે. ૧,૦૮,૦૦૦ કરોડ રૂપિયાના જંગી ખર્ચે નિર્માણ પામી રહેલા આ મહત્ત્વાકાંક્ષી કોરિડોર પર બુલેટ ટ્રેન ૩૨૦ કિલોમીટર પ્રતિ કલાકની પ્રચંડ ગતિએ દોડશે. આ પ્રોજેક્ટ અંતર્ગત આગામી એક વર્ષમાં અર્થાત્ ૧૫ ઓગસ્ટ, ૨૦૨૭ સુધીમાં પ્રથમ બુલેટ ટ્રેન દોડતી થઈ જશે તેવી પૂરી સંભાવના છે. શરૂઆતના તબક્કામાં ગુજરાતના સુરત અને બિલીમોરા વચ્ચેના ૫૦ કિલોમીટરના પટ પર તેનો ટ્રાયલ રન હાથ ધરવામાં આવશે, જ્યારે સમગ્ર મુંબઈ-અમદાવાદ રૂટ ૨૦૨૯ સુધીમાં સંપૂર્ણપણે કાર્યરત થઈ જશે.

આ પ્રોજેક્ટનો સૌથી મોટો અને રોમાંચક હિસ્સો મુંબઈ નજીક બની રહેલી દરિયાઈ રેલ ટનલ છે, જે સમુદ્રની સપાટીથી ૩૨ મીટર નીચે આશરે ૭ કિલોમીટર લાંબી બનાવવામાં આવી રહી છે. આ ટનલમાં પાણીના પ્રવાહને રોકવા માટે અદ્યતન વોટરપ્રૂફ મેમ્બ્રેન અને ટનલ બોરિંગ મશીન (TBMs) નો ઉપયોગ કરવામાં આવી રહ્યો છે. જાપાનીઝ શિંકનસેન ટેકનોલોજી પર આધારિત આ ટ્રેનના રૂટ પર કુલ ૧૨ સ્ટેશનોનું નિર્માણ થઈ રહ્યું છે, જેમાં મુંબઈનું બાંદ્રા-કુર્લા કોમ્પ્લેક્સ (BKC) મુખ્ય ટર્મિનલ રહેશે જે ૩,૬૮૦ કરોડ રૂપિયાના ખર્ચે બની રહ્યું છે.

આ પ્રોજેક્ટ માટે જાપાન સરકાર ૮૮,૦૦૦ કરોડ રૂપિયાની રાહત લોન પૂરી પાડી રહી છે, જ્યારે ભારત સરકાર અને રાજ્યો પણ તેમાં મોટું આર્થિક યોગદાન આપી રહ્યા છે. ભારતમાં પ્રથમ વખત જાપાનીઝ જે-સ્લેબ બેલાસ્ટલેસ ટ્રેક ટેકનોલોજીનો ઉપયોગ થઈ રહ્યો છે, જે ઊંચી ઝડપે પણ ટ્રેનને ઉત્તમ સ્થિરતા પૂરી પાડશે. આ પ્રોજેક્ટ પૂર્ણ થવાથી દેશના પરિવહન ક્ષેત્રમાં એક નવો ક્રાંતિકારી યુગ શરૂ થશે.