બિહારના રાજકારણમાં મોટા રાજદ્વારી સંકેત: કેન્દ્રીય મંત્રી ચિરાગ પાસવાને ફરી કર્યા પ્રશાંત કિશોરના મુક્તકંઠે વખાણ, કહ્યું- "હું પીકેના વિચારોનું સમર્થન કરું છું!"
જાતિ અને ધર્મના ભેદભાવ વિના વિકાસ અને રોજગારની વાત કરનાર કોઈપણ નેતા સાથે ઉભા રહેવાની એલજેપી-આર વડાએ વ્યક્ત કરી તૈયારી.
પટના: સ્વતંત્રતા દિવસ નિમિત્તે પટણા સ્થિત લોક જનશક્તિ પાર્ટી (રામ વિલાસ) કાર્યાલય ખાતે ધ્વજવંદન કર્યા બાદ કેન્દ્રીય મંત્રી ચિરાગ પાસવાને જન સૂરજ પાર્ટીના સ્થાપક અને નવનિયુક્ત ધારાસભ્ય પ્રશાંત કિશોર (PK) ની ખુલ્લેઆમ પ્રશંસા કરીને બિહારના રાજકારણમાં નવો ગરમાવો લાવી દીધો છે. ચિરાગે સ્પષ્ટ શબ્દોમાં જણાવ્યું હતું કે પ્રશાંત કિશોર બિહારમાં જાતિ અને ધર્મના જૂના સમીકરણોથી દૂર રહીને કેવળ વિકાસ અને રોજગાર જેવા વાસ્તવિક મુદ્દાઓ પર વાત કરી રહ્યા છે, જે બાબત સમર્થનને યોગ્ય છે.
ચિરાગ પાસવાને ઉમેર્યું હતું કે જે વ્યક્તિ બિહાર અને બિહારીઓના ભવિષ્યને આગળ ધપાવવાનું વચન આપે છે તેની સાથે તેઓ હંમેશા ઉભા રહેશે. જોકે, તેમણે એ પણ ટાંક્યું હતું કે પ્રશાંત કિશોર સામે આગામી પાંચ વર્ષમાં પોતાના વચનો પૂરા કરવાનો મોટો પડકાર છે અને સમય જ બતાવશે કે તેઓ પોતાના આ વચનો પર કેટલા ખરા ઉતરે છે. ઉલ્લેખનીય છે કે, તાજેતરમાં જ ભાજપનો ગઢ ગણાતી બાંકીપુર વિધાનસભા બેઠકની પેટાચૂંટણીમાં પ્રશાંત કિશોરે ૧૯,૦૦૦ થી વધુ મતોના માર્જિનથી ઐતિહાસિક જીત મેળવી જન સૂરજ પાર્ટીના પ્રથમ ધારાસભ્ય તરીકે ખાતું ખોલ્યું છે.
અગાઉ ૨૦૨૫ ની બિહાર વિધાનસભા ચૂંટણીમાં ૨૩૮ બેઠકો પર હારનો સામનો કર્યા બાદ બાંકીપુરની આ જીતે પ્રશાંત કિશોરને ફરી એકવાર રાષ્ટ્રીય મીડિયાના કેન્દ્રમાં લાવી દીધા છે. બાંકીપુરમાં ભાજપની હાર બાદ એનડીએ (NDA) ના ઘટક દળો વચ્ચે સંકલનના અભાવ અંગે ચિરાગ પાસવાને ચિંતા પણ વ્યક્ત કરી હતી. ચિરાગ અને પીકે વચ્ચે અગાઉ પણ પરસ્પર સન્માન અને પ્રશંસાની આપ-લે જોવા મળી છે, જેના કારણે આગામી સમયમાં બિહારની રાજકીય દિશા બદલાય તેવા સંકેતો મળી રહ્યા છે.
(9:17 PM IST)
છેલ્લા 8 દિવસમાં સૌથી લોકપ્રિય 
