રિયાધ : સાઉદી અરેબિયાના હજ અને ઉમરાહ મંત્રાલયે એક વર્ષના બહુવિધ-પ્રવેશ (મલ્ટીપલ-એન્ટ્રી) ઉમરાહ વિઝા માટેના નિયમો અને શરતો સ્પષ્ટ કરી છે. આ વિઝા જારી થયાની તારીખથી 365 દિવસ માટે માન્ય રહેશે અને યાત્રાળુઓને બહુવિધ મુલાકાતો દરમિયાન કુલ 90 દિવસ સુધી સાઉદી અરેબિયામાં રહેવાની મંજૂરી આપે છે. જો કે, મંત્રાલયે સ્પષ્ટપણે જણાવ્યું છે કે માત્ર વિઝા હોવા માત્રથી દરેક વખતે સીધો પ્રવેશ મળશે નહીં.

યાત્રાળુઓએ ધ્યાનમાં રાખવું જરૂરી છે કે સાઉદી અરેબિયા છોડ્યા બાદ વિઝા નિષ્ક્રિય થઈ જાય છે અને બીજી મુલાકાત માટે તેને ફરીથી સક્રિય કરવો પડે છે. આ માટે યાત્રાળુઓએ દરેક નવી યાત્રા પહેલા નુસુક (Nusuk) પ્લેટફોર્મ પરથી માન્ય સેવા પેકેજ ખરીદવું પડશે અને ઉમરાહ પરમિટ મેળવવી પડશે. આ ઉપરાંત, 90 દિવસની મર્યાદા દરેક મુલાકાત માટે અલગથી મળવાને બદલે વર્ષ દરમિયાનની તમામ યાત્રાઓ માટે સંચિત (તમામ યાત્રાઓ મળીને) ગણાશે.

મહત્વનો નિયમ એ છે કે આ વિઝાનો ઉપયોગ હજ 2027 ની સીઝન દરમિયાન પ્રવેશ માટે કરી શકાશે નહીં. 1 ધુ અલ-કિદાહથી 13 ધુ અલ-હિજ્જા સુધીના હજ સમયગાળા દરમિયાન આ વિઝા પ્રવેશ માટે નિષ્ક્રિય રહેશે. આથી યાત્રાળુઓને સલાહ આપવામાં આવે છે કે તેઓ હજ સીઝનની આસપાસ આ વિઝા પર સાઉદી અરેબિયાની મુસાફરીનું આયોજન ન કરે.