થાણે : કેન્દ્ર સરકાર દ્વારા તાજેતરમાં બહાર પાડવામાં આવેલા વસ્તી ગણતરીના ગેઝેટ નોટિફિકેશનમાં અન્ય પછાત વર્ગો (OBC) માટે સ્પષ્ટ અને અલગ કેટેગરીનો સમાવેશ ન કરાતાં OBC સમુદાયમાં ભારે રોષની લાગણી વ્યાપી ગઈ છે. રાષ્ટ્રીય OBC ફેડરેશને કેન્દ્ર સરકાર પર આક્ષેપ કર્યો છે કે, વ્યાપક જાતિ આધારિત વસ્તી ગણતરી કરવાની લાંબા સમયની માગને સરકારે ફરી એકવાર બાજુ પર ધકેલી દીધી છે. આ મુદ્દે ફેડરેશને સરકારને આકરા શબ્દોમાં ચેતવણી આપતાં આંદોલનનું બ્યુગલ ફૂંક્યું છે.

રાષ્ટ્રીય OBC ફેડરેશનના કોંકણ વિભાગના પ્રમુખ એકનાથ તારામાલેએ વસ્તી ગણતરીના ગેઝેટની સામગ્રી સામે તીવ્ર અસંતોષ વ્યક્ત કરતા જણાવ્યું હતું કે, ૧૪ ઓગસ્ટ ૨૦૨૬ ના રોજ જારી કરાયેલી સૂચનામાં ૪૦ પ્રશ્નોની યાદીમાં 'જાતિ' શબ્દનો ઉલ્લેખ તો છે, પરંતુ OBC સમુદાયની ગણતરી કઈ રીતે થશે તેનો કોઈ સ્પષ્ટ ઉલ્લેખ નથી. વર્ષ ૧૯૩૧ પછી OBC સમુદાયની સ્વતંત્ર ગણતરી થઈ નથી અને ૨૦૧૧ના SECC ડેટા પણ જાહેર કરાયા નહોતા. સત્તાવાર ડેટાના અભાવે સમુદાયની સામાજિક-આર્થિક સ્થિતિ, શિક્ષણ અને સરકારી યોજનાઓમાં વાસ્તવિક ભાગીદારી અંગે સચોટ માહિતી મળતી નથી.

તારામાલેએ દલીલ કરી હતી કે અનામત નીતિઓ અને સામાજિક ન્યાયના અમલીકરણ માટે સચોટ અને પારદર્શક આંકડા અત્યંત જરૂરી છે. જો કેન્દ્ર સરકાર આ ગેઝેટમાં તાત્કાલિક સુધારો કરીને OBC માટે અલગ ગણતરીનું ચોક્કસ માળખું જાહેર નહીં કરે, તો સંસદના આગામી શિયાળુ સત્ર દરમિયાન નવી દિલ્હીના રામલીલા મેદાન ખાતે વિશાળ વિરોધ પ્રદર્શન યોજવામાં આવશે. તેમણે વધુમાં ચેતવણી આપી હતી કે આ અસંતોષ દેશવ્યાપી આંદોલનમાં ફેરવાઈ શકે છે અને આગામી ચૂંટણીઓમાં શાસક પક્ષ વિરુદ્ધ રાજકીય રણનીતિ અપનાવવાની ફરજ પડશે.