કાઠમંડુ : ભારત અને નેપાળ વચ્ચેના અનન્ય, સમય-પરીક્ષણ કરાયેલા અને ગાઢ સંરક્ષણ સંબંધોને વધુ મજબૂત બનાવતા એક ભવ્ય સમારોહમાં ભારતીય સેના પ્રમુખ જનરલ ધીરજ સેઠને નેપાળ આર્મીના 'માનદ જનરલ' (Honorary General) ના સર્વોચ્ચ રેન્કથી નવાજવામાં આવ્યા છે. સોમવારે કાઠમંડુ સ્થિત રાષ્ટ્રપતિ ભવન 'શીતલ નિવાસ' ખાતે આયોજિત વિશેષ કાર્યક્રમમાં નેપાળના રાષ્ટ્રપતિ રામચંદ્ર પૌડેલ દ્વારા જનરલ સેઠને આ સન્માન પ્રદાન કરવામાં આવ્યું હતું.

જનરલ ધીરજ સેઠ નેપાળી સેના પ્રમુખ જનરલ અશોક રાજ સિગ્ડેલના ખાસ આમંત્રણ પર ચાર દિવસીય સત્તાવાર મુલાકાતે રવિવારે કાઠમંડુ પહોંચ્યા હતા. આ સન્માન સમારોહમાં નેપાળના ઉપરાષ્ટ્રપતિ રામ સહાય પ્રસાદ યાદવ, વિદેશ પ્રધાન શિશિર ખનાલ, નેપાળમાં ભારતના રાજદૂત નવીન શ્રીવાસ્તવ તેમજ નેપાળ સેના અને સરકારના ઉચ્ચ અધિકારીઓ ખાસ ઉપસ્થિત રહ્યા હતા. આ કાર્યક્રમ ૧૯૫૦થી ચાલી આવતી તે ઐતિહાસિક પરંપરાનો એક ભાગ છે, જે હેઠળ બંને દેશો એકબીજાના સેના પ્રમુખોને માનદ જનરલનો દરજ્જો આપીને પરસ્પર સન્માન વ્યક્ત કરે છે.

પોતાની મુલાકાત દરમિયાન જનરલ સેઠે નેપાળ આર્મી હેડક્વાર્ટર ખાતે જનરલ સિગ્ડેલ સાથે દ્વિપક્ષીય લશ્કરી સહયોગ અને વ્યૂહાત્મક હિતો પર ઊંડાણપૂર્વક ચર્ચા કરી હતી. આ ઉપરાંત, તેમણે ભારતીય દૂતાવાસમાં રાજદૂત નવીન શ્રીવાસ્તવ સાથે મુલાકાત કરી નવી દિલ્હી અને કાઠમંડુ વચ્ચેના સંબંધોને વધુ સુદ્રઢ કરવા અંગે વિચાર-વિમર્શ કર્યો હતો. નેપાળી સેનાને વધુ સજ્જ બનાવવાના હેતુથી જનરલ સેઠે આધુનિક લશ્કરી અને તબીબી સાધનો સોંપ્યા હતા. હેડક્વાર્ટર પરિસરમાં છોડ વાવીને અને ગાર્ડ ઓફ ઓનરનું નિરીક્ષણ કરીને તેમણે બંને દેશોની સેનાઓ વચ્ચેના પરસ્પર વિશ્વાસ અને મિત્રતાને નવો અયામ આપ્યો હતો.