નવી દિલ્હી : મહારાષ્ટ્રના રાજકારણ અને કેન્દ્રીય રાજકારણમાં મોટા વ્યૂહાત્મક ફેરફારોની વ્યાપક અટકળો વચ્ચે રાજ્યના મુખ્યમંત્રી દેવેન્દ્ર ફડણવીસે સોમવારે નવી દિલ્હી ખાતે વડા પ્રધાન નરેન્દ્ર મોદી સાથે એક મહત્વપૂર્ણ મુલાકાત કરી હતી. ભારતીય જનતા પાર્ટી (ભાજપ) દ્વારા પોતાની નવી રાષ્ટ્રીય ટીમની જાહેરાત કરવામાં આવ્યા બાદ અને કેન્દ્રીય મંત્રીમંડળમાં મોટા ફેરબદલની ચર્ચાઓ વચ્ચે આ મુલાકાત યોજાતા રાજકીય ગરમાવો આવી ગયો છે. મીડિયામાં એવી જોરદાર ચર્ચા ચાલી રહી હતી કે ફડણવીસ મહારાષ્ટ્રનું મુખ્યમંત્રી પદ છોડીને કેન્દ્ર સરકારમાં અગત્યની જવાબદારી સંભાળી શકે છે.

જોકે, વડા પ્રધાન મોદી સાથેની બેઠક બાદ પત્રકારો સાથે વાતચીત કરતી વખતે દેવેન્દ્ર ફડણવીસે રાષ્ટ્રીય રાજકારણમાં પ્રવેશ અંગેની તમામ અટકળોને સંપૂર્ણપણે ફગાવી દીધી હતી. તેમણે સ્પષ્ટતા કરી હતી કે તેમની આ મુલાકાત મહારાષ્ટ્રના બાકી રહેલા વિકાસ પ્રોજેક્ટ્સ, ઈન્ફ્રાસ્ટ્રક્ચર અને ઔદ્યોગિક મંજૂરીઓ અંગે કેન્દ્ર સરકાર સાથે સંકલન સાધવા માટે હતી. પોતાની દિલ્હી બદલીની અટકળો વિશે હળવા અંદાજમાં પ્રહાર કરતા તેમણે જણાવ્યું હતું કે, "ઘણા લોકો માને છે કે મારે દિલ્હી જવું જોઈએ, પરંતુ હું બધાને કહું છું કે હું મુંબઈમાં જ છું. લોકો પાસે બીજું કંઈ કરવાનું નથી તેથી તેઓ મારી ચર્ચા કરે છે."

કેન્દ્રીય મંત્રીમંડળમાં ફેરબદલની ચર્ચાઓ એવા સમયે વેગ પકડી રહી છે જ્યારે સંસદનું ચોમાસુ સત્ર પૂર્ણ થઈ ચૂક્યું છે અને કેન્દ્રમાં કેટલીક જગ્યાઓ ખાલી પડી છે. શિવસેના નેતા સંજય રાઉતે ફડણવીસના દિલ્હી ટ્રાન્સફરનો દાવો કર્યો હતો, જ્યારે કેન્દ્રીય મંત્રી રામદાસ આઠવલેની ટિપ્પણીઓએ પણ રાજકીય સમીકરણો અંગે નવી ચર્ચાઓ જગાવી છે. આ તમામ ઘટનાક્રમ વચ્ચે ફડણવીસે પુનરુચ્ચાર કર્યો હતો કે વડાપ્રધાન મોદી અને મહારાષ્ટ્રની જનતાએ તેમને જે રાજ્યની સેવા કરવાની જવાબદારી સોંપી છે, તે તેઓ નિષ્ઠાપૂર્વક નિભાવતા રહેશે.