વોશિંગ્ટન ડી.સી., તા.૧૮: અમેરિકામાં સ્થાયી થવાનું અને પરમેનન્ટ રેસિડન્સી (ગ્રીન કાર્ડ) મેળવવાનું સ્વપ્ન સેવતા લાખો આંતરરાષ્ટ્રીય પ્રોફેશનલ્સ અને તેમના પરિવારજનો માટે દર મહિને રજૂ થતું 'યુએસ વિઝા બુલેટિન' એક આશાનું કિરણ લઈને આવે છે. યુએસ ડિપાર્ટમેન્ટ ઓફ સ્ટેટ દ્વારા દર મહિને પ્રકાશિત કરવામાં આવતું આ માસિક બુલેટિન એ નક્કી કરે છે કે કઈ ઇમિગ્રેશન શ્રેણી, કયા દેશ અને કઈ પ્રાયોરિટી ડેટ (Priority Date) ધરાવતા અરજદારો ગ્રીન કાર્ડની સફરમાં આગળ વધી શકશે.

વાર્ષિક કોટા અને મર્યાદિત વિઝા સંખ્યાના કારણે ગ્રીન કાર્ડની માંગ અને પુરવઠા વચ્ચે મોટો તફાવત ઊભો થાય છે, જેને કારણે લાંબો રાહ જોવાનો સમયગાળો (બેકલોગ) સર્જાય છે. વિઝા બુલેટિન મૂળભૂત રીતે ગ્રીન કાર્ડના દાવેદારો માટે એક ડિજિટલ 'વેઇટિંગ લિસ્ટ' અથવા ટોકન સિસ્ટમ તરીકે કામ કરે છે, જે સ્પષ્ટ કરે છે કે કતારમાં તમારો નંબર ક્યારે આવશે.

કોણે બુલેટિન પર નજર રાખવી જરૂરી છે?
મુખ્યત્વે રોજગાર-આધારિત (Employment-Based: EB-1, EB-2, EB-3, EB-4, EB-5) અને કૌટુંબિક-પ્રાયોજિત (Family-Sponsored: F1, F2A, F2B, F3, F4) શ્રેણીઓમાં અરજી કરનારા લોકો માટે આ બુલેટિન અત્યંત મહત્વનું છે. ખાસ કરીને ભારત અને ચીન જેવા દેશોના આઇટી પ્રોફેશનલ્સ અને કુશળ કામદારો માટે અરજીઓની સંખ્યા ઘણી વધારે હોવાથી તેમને વર્ષો સુધી વિઝા બુલેટિનના કટ-ઓફ પર નજર રાખવી પડે છે. જોકે, યુએસ નાગરિકોના તાત્કાલિક સંબંધીઓ (પતિ/પત્ની, સગીર બાળકો અને માતા-પિતા) માટે કોઈ વાર્ષિક મર્યાદા ન હોવાથી તેમને આ કતારમાં ઊભા રહેવું પડતું નથી.

પ્રાયોરિટી ડેટ અને બે ચાર્ટનું ગણિત:
વિઝા બુલેટિન સમઝવા માટે ત્રણ બાબતો જાણવી જરૂરી છે: તમારી ગ્રીન કાર્ડ શ્રેણી, જન્મનો દેશ અને તમારી પ્રાયોરિટી ડેટ. જ્યારે લેબર સર્ટિફિકેશન કે ઇમિગ્રન્ટ પિટિશન યોગ્ય રીતે ફાઇલ થાય ત્યારે જે તારીખ મળે તેને પ્રાયોરિટી ડેટ કહેવાય છે.

બુલેટિનમાં બે અલગ-અલગ ચાર્ટ હોય છે, જે અવારનવાર અરજદારોમાં દ્વિધા ઊભી કરે છે:

•    ફાઇલિંગ માટેની તારીખો (Dates for Filing): આ ચાર્ટ દર્શાવે છે કે અરજદાર પોતાના જરૂરી દસ્તાવેજો અને સ્ટેટસ એડજસ્ટમેન્ટ (Adjustment of Status) માટેની અરજી ક્યારે સબમિટ કરી શકે છે.

•    અંતિમ કાર્યવાહી તારીખો (Final Action Dates): આ ચાર્ટ દર્શાવે છે કે તમારા કેસ પર આખરી મંજૂરી આપવા અને ગ્રીન કાર્ડ ઇશ્યૂ કરવા માટે વિઝા નંબર ઉપલબ્ધ છે કે નહીં.

સંકેતોનો ખેલ અને 'રેટોગ્રેશન' નો આંચકો:
બુલેટિનમાં અંકો ઉપરાંત 'C' (Current) અને 'U' (Unauthorized) શબ્દો જોવા મળે છે. 'C' નો અર્થ છે કે તે કેટેગરીમાં રાહ જોયા વિના પ્રોસેસિંગ ચાલુ છે, જ્યારે 'U' નો અર્થ છે કે તે મહિના માટે વિઝા નંબરો ઉપલબ્ધ નથી. વધુમાં, ક્યારેક કટ-ઓફ તારીખો આગળ વધવાને બદલે પાછળ ધકેલાય છે, જેને રેટ્રોગ્રેશન (Retrogressions) કહે છે. વિઝાની માંગ અચાનક વધી જાય ત્યારે યુએસ સરકાર આ પગલું ભરે છે. તેથી, ફાઇલિંગ માટે પાત્ર બનવું અને આખરી ગ્રીન કાર્ડ હાથમાં આવવું એ બે અલગ-અલગ તબક્કા છે.